Gyzgyn - Gyzgyn Entryler

«Arsenal» aratapawudy 8 utuga çykardy

gyzgyn — Thu, 19 Jan 2023 18:40:46 +0000

Angliýanyň premýer-ligasynda turnir tablisasynyň başyny çekýän «Arsenal» ýaryşyň 20-nji tapgyrynda myhmançylykda «Tottenhemi» 0:2 hasabynda ýeňlişe sezewar edip, ikinji ýerdäki «Mançester Siti» bilen aradaky utuk tapawudyny artdyrdy. London derbisinde «topçulara» ýeňiş getiren gollaryň birinjisini 14-nji minutda «Tottenhemiň» derwezeçisi Lýoris öz derwezesine ýollan bolsa, ikinji gol 36-njy minutda Edegor tarapyndan geçirildi. Şeýlelikde, «Arsenal» bassyr ýeňlişsiz oýunlarynyň sanyny 12-ä ýetirip, birinji orna has-da ykjam ornaşdy. Häzirki wagtda birinji ýerdäki «Arsenalda» 47, ikinji ýerdäki «Mançester Sitide» 39, üçünji ýeri paýlaşyp duran «Nýukasl» we «Mançester Ýunaýted» toparlarynda bolsa 38 utukdan bar. Ozal habar berşimiz ýaly, şenbe güni 20-nji tapgyrdan orun alan oýunda «Mançester Ýunaýted» «Mançester Sitini» 2:1 hasabynda ýeňlişe sezewar edipdi. Mundan başga-da tapgyryň üns çekiji netijeleriniň hatarynda «Liwerpulyň» myhmançylykda «Braýtondan» 3:0 hasabynda ýeňilmegini, «Nýukaslyň» «Fulhemi» öz öýünde 1:0 hasabynda utmagyny hem-de uzaga çeken şowsuzlykdan soňra ahyrsoňy «Çelsiniň» «Krystal Pelasy» 1:0 hasabynda ýeňlişe sezewar etmegini görkezmek bolar.

«Barselona» 14-nji gezek Ispaniýanyň Superkubogyna mynasyp boldy

gyzgyn — Thu, 19 Jan 2023 18:40:43 +0000

«Barselona» El-klassikoda «Realy» utup, on dördünji gezek Ispaniýanyň Superkubogyna mynasyp boldy. Saud Arabystanynda geçirilen final oýny 3:1 hasabynda «Barselonanyň» ýeňşi bilen tamamlandy. «Barselonanyň» düzüminde Gawi (33), Lewandowski (45) we Pedri (69) tapawutlandy. «Realyň» ýeke-täk jogap topy bolsa Karim Benzemanyň (90) adyna ýazyldy. Şeýlelikde, «Barselona» öz taryhynda on dördünji gezek Ispaniýanyň Superkubogyna eýe çykyp, bu ugurda esasy garşydaşy «Realdan» (12) ýene öňe saýlandy. Bellemeli zatlaryň ýene biri-de bu kubok Hawi üçin «Barselonanyň» baş tälimçisi hökmünde gazanylan ilkinji titul boldy. Maglumat üçin, «Barselona» häzirki wagtda 41 utuk bilen La liganyň turnir tablisasynda hem birinji ýeri özünde saklaýar. Ikinji ýerdäki «Realda» bolsa 38 utuk bar.

Mary welaýat kitaphanasynda 3 milliondan gowrak kitap saklanylýar

gyzgyn — Thu, 19 Jan 2023 18:40:40 +0000

Mary welaýat kitaphanasy geçen asyryň başynda, has takygy 1912-nji ýylda esaslandyrylan Merw etrap kitaphanasynyň esasynda döredilip başlandy. Täze döwrebap binanyň gurluşygy 2010-njy ýylyň fewral aýynda başlandy we 2011-nji ýylyň oktýabr aýynda resmi taýdan açyldy. 42 metr beýiklikdäki kitaphananyň binasynda kitap saklanýan ýer, kitap ussahanasy, okamak we internet otaglary, konferensiýa otaglarydyr ýörite bölümleriň ofisleri bar. Kitaphananyň kitap gaznasy 3 milliondan gowrak bolup, her ýyl olaryň üsti ýetirilip durulýar. Okyjylar berilmezinden ozal, kitaphanadan alnan islendik neşir belli bir tehnologiki işleýiş prosesinden geçýär, bu baradaky maglumatlar ýörite žurnallara girizilýär. Her bir kitap, broşýura ýa-da elektron disk üçin ýörite bibliografik düşündiriş düzülýär, her bir resminama aýratyn belgi berilýär, onuň üsti bilen bolsa hemişe neşir barada maglumat alyp bolýar. Kitaphananyň esasy aýratynlyklaryndan biri-de çigildem ýapraklary görnüşinde ýasalan gümmeziniň aşagynda güýçli teleskopyň bolmagydyr. Mundan ozal Mary welaýat kitaphanasynyň gymmatly gaznasynda seýrek kitaplaryň 700-siniň saklanýandygyny habar beripdik.

Aşgabatdaky Eýranyň Medeniýet merkezinde Ejeler güni bellenildi

gyzgyn — Thu, 19 Jan 2023 18:40:38 +0000

Aşgabatdaky Eýran Yslam Respublikasynyň Medeniýet merkezinde Ejeler güni mynasybetli baýramçylyk dabarasy geçirildi. Ejeler güni Eýranda Muhammet pygamberiň gyzy Patma Zahranyň doglan güni mynasybetli döredildi, ol yslam dünýäsinde enäniň ideal keşbi we ähli musulman zenanlara görelde almak üçin nusga hasaplanýar.

«Atalanta» A seriýada asyryň rekordyny täzeledi

gyzgyn — Thu, 19 Jan 2023 18:40:35 +0000

«Atalanta» Italiýanyň A seriýasynyň 18-nji tapgyrynda «Salernitanany» 8:2 hasabynda ýeňlişe sezewar etdi. Oýunda Jan Pýer Gasperininiň şägirtleri birinji ýarymda 5, ikinji ýarymda bolsa 3 gol geçirdi. «Opta» statistiki neşiriniň habar bermegine görä, «Atalanta» öz taryhynda ilkinji gezek A seriýanyň çägindäki oýunda 8 gol geçirdi. Şeýle-de bergamo topary 21-nji asyrda A seriýanyň oýnunda 8 gol geçiren ilkinji klub boldy. Mundan ozal, Milan şäheriniň «Inter» 1996-njy ýylda «Padowanyň» derwezesine 8 gol geçiripdi. Gyzykly tarapy, şol oýun hem 8:2 hasabynda tamamlanypdy. A seriýanyň 18-nji tapgyrynyň esasy netijeleriniň hatarynda «Milanyň» myhmançylykda «Leççe» bilen 2:2 hasabynda deň oýnamagyny, Interiň» öz öýünde «Weronany» 1:0, «Lasionyň» myhmançylykda «Sassuolony» 2:0, «Romanyň» öz öýünde «Fiorentinany» 2:0 ýeňmegini görkezip bolar. Ozal habar berşimiz ýaly, A seriýanyň 18-nji tapgyrynyň merkezi oýnunda «Napoli» «Ýuwentusy» uly hasapda ýeňlişe sezewar bolupdy. 18-nji tapgyrdan soňra «Napoli» utuklarynyň sanyny 47-ä ýetirip, ýaryş jedwelinde liderligini pugtalandyrdy. Ikinji ýerdäki «Milanyň» hasabynda 38 utuk bar. Hersi 37 utukdan toplan «Inter» we «Ýuwentus» bolsa üçünji orunlary paýlaşýarlar.

Türkmenistanda harby mekdeplere okuwa kabul edişlik başlady

gyzgyn — Thu, 19 Jan 2023 18:40:33 +0000

Türkmenistanyň orta mekdepleriniň 8-nji synpyny şu ýyl tamamlajak okuwçy oglanlary üçin ýurduň Goranmak Ministrliginiň ýöriteleşdirilen mekdeplerine 2023-2024-nji okuw ýyly üçin kabul edişlik başlady. Bu barada türkmen metbugaty habar berdi.
Bu mekdeplerde okuwyň möhleti 4 ýyl bolar. Olarda harby taýýarlygyň esaslaryny çuňňur öwrenmek boýunça, beden we ruhy terbiýäni kämilleşdirmek boýunça işler alnyp barylýar.
Harby mekdepleriň dalaşgärleri aşakdaky resminamalaryň sanawy bilen ýerli harby wekillige arza tabşyrmalydyrlar:
Dalaşgäriň ene-atasynyň onuň harby mekdebiň okuwçysy bolmagyna razydygy baradaky ýazmaça tassyklamasy (eger-de ene-atasy Türkmenistanyň çäginde ýaşamaýan bolsa, degişli resminamany Döwlet migrasiýa gullugy berýär);
Ene-atasynyň pasporty;
Anketa we terjimehal;
Dogluş hakynda şahadatnama;
Orta mekdepde ýetişigi baradaky kepilnama (1, 2 we 3 çärýekleriň bahalary);
3х4 ölçegde 6 surat, 4х6 ölçegde 4 surat, 9х12 ölçegde 2 surat;
Orta mekdep tarapyndan berlen häsiýetnama;
Mekdebiň direktory tarapyndan tassyklanan şahsy iş;
Saglyk kartasy, ýaşaýan ýerinden saglyk ýagdaýy barada kepilnama;
Sanjymlar baradaky öňüni alyş kartasy;
Ýaşaýan ýeri barada kepilnama we maşgala ýagdaýy barada maglumat;
Ene-atasynyň biriniň ölendigi barada kepilnama (eger-de bar bolsa);
Geçmek üçin esasy şert – mekdep maksatnamasynyň 8-nji synpa çenli ähli dersleri boýunça test-synag we türkmen dilinden diktant. Synag-testi üstünlikli tabşyran dalaşgärler umumy ýaşaýyş jaýynda ýer, dört wagtyna iýmit we dynç almak üçin gerekli serişdeler bilen üpjün ediler.

Aşgabadyň merkezinden 20 kilometr uzaklykda adaty bolmadyk garbanyşhana açyldy

gyzgyn — Thu, 19 Jan 2023 18:40:29 +0000

Aňyrsy görünýän aýnadan edilen kapsula şekilindäki täze kafe Aşgabatdan 20 km uzaklykda dynç alyş zolagynda açyldy. Onuň suratyny sosial torlardan peýdalanyjylar ýaýratdylar. Içinde otag temperaturasy bolan şar şekilli kapsulalardan töwerekdäki tebigatyň garly görnüşine syn edip we ýewropa aşhanasy, şeýle hem türkmen tagamlaryndan lezzet alyp bolýar. Kapsulalar organiki aýnadan ýasalyp, ol zäherli gazlary emele getirmeýär we adaty aýnadan 5 esse berkdir.

Türkmenistanda gündizlerine howa biraz maýlar

gyzgyn — Thu, 19 Jan 2023 18:40:27 +0000

Türkmenistanyň Oba hojalyk we daşky gurşawy goramak ministrliginiň Gidrometeorologiýa baradaky gullugy metbugatda ýurtda şu hepdäniň dowamynda boljak howanyň ýagdaýy barada maglumaty paýlaşdy. Balkan welaýatynda: üýtgäp durýan bulutly howa bolup, demirgazyk-gündogardan demirgazyk-günbatara ugruny üýtgedýän, tizligi sekuntda 6 — 11 metrden 12 — 17 metre ýetýän şemal öwser. Howa gijelerine -5… -10 gradus sowukdan -2… +3 gradus aralygynda maýyl, gündizlerine +4… +9 gradus, welaýatyň kenarýaka etraplarynda 0… +5 gradus maýyl bolar. Ahal welaýatynda: üýtgäp durýan bulutly howa bolup, demirgazyk-günbatardan günorta-günbatara ugruny üýtgedýän, tizligi sekuntda 6 — 11 metrden 11 — 16 metre ýetýän şemal öwser. Howa gijelerine -2… -7 gradusdan -10… -15 gradus aralygynda sowuk, gündizlerine 0… -5 gradus sowukdan +1… +6 gradus aralygynda maýyl bolar. Mary welaýatynda: üýtgäp durýan bulutly howa bolup, demirgazyk-günbatardan günorta-günbatara ugruny üýtgedýän, tizligi sekuntda 6 — 11 metrden 11 — 16 metre ýetýän şemal öwser. Howa gijelerine -4… -9 gradusdan -14… -19 gradus aralygynda sowuk, gündizlerine -2… -7 gradus sowukdan +1… +6 gradus aralygynda maýyl bolar. Lebap welaýatynda: üýtgäp durýan bulutly howa bolup, gündogardan günorta-günbatara ugruny üýtgedýän, tizligi sekuntda 6 — 11 metrden 11 — 16 metre ýetýän şemal öwser. Howa gijelerine -5… -10 gradusdan -14… -19 gradus aralygynda sowuk, gündizlerine -2… -7 gradus sowukdan 0… +5 gradus aralygynda maýyl bolar. Daşoguz welaýatynda: üýtgäp durýan bulutly howa bolup, günorta-gündogardan günbatara ugruny üýtgedýän, tizligi sekuntda 6 — 11 metrden 11 — 16 metre ýetýän şemal öwser. Howa gijelerine -6… -11 gradusdan -11… -16 gradus aralygynda sowuk, gündizlerine -1… -6 gradus sowukdan -3… +2 gradus aralygynda maýyl bolar. Aşgabatda: üýtgäp durýan bulutly howa bolup, demirgazyk-günbatardan günorta-günbatara ugruny üýtgedýän, tizligi sekuntda 6 — 8 metrden 13 — 15 metre ýetýän şemal öwser. Howa gijelerine -4… -6 gradusdan -10… -12 gradus aralygynda sowuk, gündizlerine -2… -4 gradus sowukdan +2… +4 gradus aralygynda maýyl bolar.

2023 Parahatçylygyň kepili hökmünde dialogyň halkara ýyly

gyzgyn — Thu, 19 Jan 2023 18:40:25 +0000

2023-nji ýyly «Parahatçylygyň kepili hökmünde dialogyň halkara ýyly» diýip yglan etmegiň dabarasy 27-nji ýanwarda geçiriler. Bu barada BMG-niň Türkmenistandaky wekilhanasynyň resmi web sahypasynda habar berildi. Resmi dabara BMG-ä agza döwletleriň, degişli halkara we sebit guramalarynyň hem-de raýat jemgyýetleriniň wekilleriniň gatnaşmagynda garyşyk görnüşde geçiriler diýlip, habarda aýdylýar. Mälim bolşy ýaly, BMG-niň Baş Assambleýasynyň 77/32 belgili Kararnamasyna laýyklykda, 2023-nji ýyl «Parahatçylygyň kepili hökmünde dialogyň halkara ýyly» diýlip yglan edildi. Kararnama Türkmenistanyň başlangyjy bilen kabul edildi. Bu başlangyç Birleşen Milletler Guramasynyň Baş sekretarynyň parahatçylygy berkitmek üçin Täze gün tertibi bilen gönüden-göni baglanyşykly bolup, ol global strategik töwekgelçilikleri azaltmagy, gapma-garşylyklaryň öňüni almaga we parahatçylygy gurmaga maýa goýmagy hem-de sebitleýin öňüni alyş çärelerini goldamagy öz içine alýar.

Maryda boş iş orunlarynyň ýarmarkasy geçiriler

gyzgyn — Thu, 19 Jan 2023 18:40:23 +0000

Ýene-de dört günden 20-nji ýanwarda Mary welaýatynyň Ýolöten etrabynyň zähmet we ilatyň iş bilen üpjünçiligi bölüminde boş iş orunlarynyň ýarmarkasy geçiriler. Mary welaýat häkimliginiň «Maru-Şahu Jahan» gazetinde habar berlişi ýaly, welaýatyň işe ýerleşmek isleýän ýerli ýaşaýjylary, şeýle hem etrabyň çäginde ýerleşýän dürli edaralaryň, guramalaryň we kärhanalaryň wekilleri bu ýarmarka gatnaşmaga çagyrylýar. Iş ýerlerini gözleýänleriň ýanynda şahsyýetini tassyklaýan resminamasy, zähmet depderçesi (bar bolsa), şeýle hem hünär bilimi baradaky şahadatnamasy bolmalydyr. Ýarmarka sagat 9:00-dan 12:00-a çenli aralykda geçiriler.

«Älemiň hanymy» bäsleşigi Gyrgyzystandan ötünç sorady

gyzgyn — Thu, 19 Jan 2023 18:40:21 +0000

«Älemiň hanymy» bäsleşigiň guramaçylary ýurduň adyny dogry aýdyp bilmändigi üçin Gyrgyz Respublikasyndan we onuň wekilinden ötünç soradylar. Bu barada «Gazeta.ru» ýazýar. «Älemiň hanymy» bäsleşiginiň ýolbaşçysy Emi Emmerih bäsleşigiň alypbaryjysynyň deslapky tapgyrda «Gyrgyzystan» diýip dogry aýdyp bilmändigini we tomaşaçylara ýurduň wekiliniň mynasyp yglan edilmändigini nygtap: «Bize has gowy işlemek gerek. Bu aklap bolmajak ýalňyşlyk, şonuň üçin ötünç soramak isleýäris» diýdi. «Älemiň hanymy» bäsleşiginde Gyrgyzystana wekilçilik eden 18 ýaşly Altynaý Botoýarowa ötünji kabul edýändigini aýdyp, guramaçylaryň bu meselä çynlakaý üns berendikleri üçin minnetdarlyk bildirdi. Täze Orlean ştatynda geçen «Älemiň hanymy» gözellik bäsleşigine dünýäniň 86 ýurdunyň wekilleri gatnaşdy. Bäsleşikde ABŞ-nyň wekili R’Bonni Gabriel ýeňiji boldy. Surat: absatz.media

Aşgabatda «Ýaşlyk ýyllarymyzyň aýdymlary» ýaňlanar

gyzgyn — Thu, 19 Jan 2023 18:40:19 +0000

Eger siz ýaşlyk ýyllaryňyzda gulagyňyzda galan aýdymlary küýsän bolsaňyz, 22-nji ýanwar gününiň agşamynda Aşgabatda geçiriljek konsertiň myhmany bolup, gulaklaryňyzyň posuny açyp bilersiňiz. Şol gün Mukamlar köşgünde geçiriljek konsertde Türkmenistanyň görnükli estrada ýyldyzlary öz ýaşlyk ýyllarynyň meşhur aýdymlaryny ýatlarlar we geçen ýyllaryň daşary ýurt hitlerini ýerine ýetirerler. Konsertde dünýä meşhur «Kawkaz ýesiri», «Disko tansçysy», «Alybaba we kyrk garakçy», «Titanik» ýaly filmleriň aýdymlary we sazlary ýaňlanar. Konsert 22-nji ýanwar güni agşam sagat 18-de başlanar.

Türkmenistanyň şäherlerinde sowuk howanyň rekord derejeleri hasaba alyndy

gyzgyn — Thu, 19 Jan 2023 18:40:17 +0000

Birki günlükde Türkmenabat şäheriniň taryhynda iň sowuk howa hasaba alyndy. «Meteožurnal» neşiri tarapyndan 1894-nji ýyldan bäri ýöredilip gelinýän gözegçilikleriň netijesinde anna güni şäherde howa -25,4 gradusa çenli düşdi. Bu bolsa şäheriň taryhyndaky rekord görkezijidir. «Orientiň» habar berşi ýaly, Serhetabat şäherinde hem sowuk howa rekorda ýakynlaşdy. Bu şäherde gije temperatura -27° gradusa çenli düşdi. Şu ýylky gyş bu şäherde 1969-njy we 2008-nji ýyllaryň sowugyny hasaba almanyňda, syn etmeleriň taryhynda ikinji sowuk gyş boldy. Bu ýerde diňe 1905-nji ýylda has sowuk howa -33,8° dereje bolupdy. Aşgabatda iň pes temperatura anna güni -16,4° dereje boldy. Bu hem şäher üçin iň pes rekord temperaturadyr. Şeýle hem adaty bolmadyk sowuklaryň zolagyna Mary welaýatynyň uly bolmadyk ýerleri, Lebap welaýatynyň günorta we merkezi etraplarynyň bir bölegi we Ahalyň günorta-gündogary girýär.

Gruziýada bulaşyk howanyň netijelerini aradan aýyrýarlar

gyzgyn — Thu, 19 Jan 2023 18:40:15 +0000

Gruziýada uzaga çeken bulaşyk howanyň ýetiren zyýanyny aradan aýyrýarlar diýip, «Habar 24» ýazýar. Bütin hepdeläp ýurduň gündogarynda güýçli gar ýagmagy netijesinde ýollarda kynçylyklar döredi. Indi uly ýollary gije-gündizläp arassalaýarlar. Emma garyň köp ýagmagy sebäpli ýörite tehnikalar ýetişmeýärler, şol sebäpli halkara ýollaryň käbir böleklerinde hereketi çäklendirmeli boldy. Ýurduň demirgazygynda bolsa, güýçli şemal kynçylyklary döretdi. Lançhuti obasynda bir adamyň ulagynyň üstüne agaç ýykylyp, heläk boldy. Sebitde ýaşaýyş öýleriniň 120-sine, dört mekdebe we üç çagalar bagyna zeper ýetdi. Elektrik geçirijileriň diregleri ýykyldy. Ilatly ýerleriň birnäçesinde gaz we suw üpjünçiligi kesildi.

Russiýanyň Premýer-ministri Mihail Mişustin Türkmenistana sapar bilen geler

gyzgyn — Thu, 19 Jan 2023 18:40:13 +0000

Russiýanyň Premýer-ministri Mihail Mişustin 19-20-nji ýanwarda Türkmenistanda saparda bolar. Bu barada «Дагестанская правда» onlaýn neşiri habar berýär. Mihail Mişustiniň ýolbaşçylygyndaky rus wekiliýeti Aşgabatda geçiriljek türkmen-rus işewürlik forumyna gatnaşar. Bu forum Türkmenistan bilen Russiýa Federasiýasynyň arasyndaky söwda, ykdysady we senagat pudagyndaky hyzmatdaşlygy has-da çuňlaşdyrmaga gönükdirilendir. Forumda geçiriljek duşuşyklar transport we logistika, senagat, bilim, sanly gün tertibi we iki ýurduň kompaniýalarynyň arasyndaky beýleki ugurlar boýunça hyzmatdaşlyga bagyşlanar. Çäräniň çäginde russiýaly öndürijileri üçin «Russiýanyň söwda öýi» söwda we sergi meýdançasynyň açylyş dabarasynyň geçirilmegi meýilleşdirilýär. Işewürlik forumynyň ilkinji gününde senagat B2B duşuşyklarynyň geçirilmegine garaşylýar. Mihail Mişustin Russiýanyň Prezidenti Wladimir Putiniň Karary bilen 2020-nji ýylyň 16-njy ýanwarynda Russiýa Federasiýasynyň Premýer-ministri wezipesine bellendi. Şeýlelikde Mihail Mişustin Russiýanyň Premýer-ministri hökmünde ilkinji gezek Türkmenistana geler.

Rahat Japarow Belarusyň «Gomel» toparynda synagdan geçýär

gyzgyn — Thu, 19 Jan 2023 18:40:11 +0000

Türkmenistanyň futbol boýunça milli ýygyndysynyň derwezeçisi Rahat Japarow şu günler Belarusyň «Gomel» futbol toparynyň okuw-türgenleşik ýygnanyşygyna gatnaşyp, ol bu toparyň tälimçileriniň synagyna gatnaşýar. Eger Rahat tälimçileriň göwnünden turup bilse, ol karýerasyny Belarusyň çempionatynda dowam etdirip biler. Futbolçynyň agenti Gennadiý Hristoforidi türkmen metbugatyna beren maglumatynda Gomel şäheriniň toparynyň türkmenistanly derwezeçi bilen şertnama baglaşmaga ýakyndygyny aýtdy. Rahat Japarowa Ermenistan we Gruziýanyň toparlaryndan hem teklip geldi. Häzir bu toparlar futbolçynyň öz pikirine garaşýarlar. Rahat Japarow bilen Özbegistanyň «Surhon» topary hem ýakyndan gyzyklanýar. Maglumat üçin belläp geçsek, Rahat Japarow 2021-nji ýylda «SSKA-nyň» düzüminde Täjigistanyň çempionatynyň iň gowy derwezebany bolmagy başaran bolsa, ol 2022-nji ýylda bu netijäni «Abdyş-Atanyň» düzüminde — Gyrgyzystanda gaýtalamagy başardy.

Ýewropanyň täzeleniş we ösüş banky Türkmenistanyň eksport mümkinçiligini ýokarlandyrmaga goldaw berer

gyzgyn — Thu, 19 Jan 2023 18:40:09 +0000

Ýewropanyň täzeleniş we ösüş banky Türkmenistanyň eksport mümkinçiligini ýokarlandyrmaga ýardam edýär. Bu barada ÝTÖB-iň Türkmenistandaky wekilhanasynyň ýolbaşçysy Fatih Türkmenoglunyň sözlerine salgylanyp, «Trend» habar berýär. Fatih Türkmenogly ÝTÖB-iň Türkmenistanyň eksport mümkinçiligini ýokarlandyrmaga edýän goldawy barada şeýle gürrüň berýär: — 2022-nji ýylyň 20-nji oktýabrynda ÝTÖB-iň telekeçilere maslahat beriş maksatnamasynyň çäklerinde türkmen önüm öndürijileriniň goňşy döwletlere eksportyny ýola goýmak bilen bagly onlaýn duşuşyk geçirildi. Bu duşuşyk bankymyz tarapyndan ýurtda kiçi we orta telekeçiligi höweslendirmek boýunça ýörite maksatnamanyň bir bölegi bolup durýar. Türkmenoglunyň bellemegine görä, ÝTÖB-iň Türkmenistandaky telekeçilere maslahat beriş maksatnamasy 2014-nji ýyldan bäri hereket edýär we ol bank tarapyndan maliýeleşdirilýär. Bu maksatnama türkmen işewürleriniň eksport bilen bagly düşünjelerini ýokarlandyrmagy, olara täze hyzmatdaşlary tapmakda goldaw bermegi göz öňünde tutýar. — Çäreleriň tapgyry 2020-2021-nji ýyllar boýunça Merkezi Aziýa ýurtlarynyň we Mongoliýanyň bazaryndaky gözlegleriň netijesine esaslandy. Degişli maksatnamanyň çäginde Ýewropanyň täzeleniş we ösüş banky Merkezi Aziýa ýurtlaryna önümlerini eksport etmek isleýän hususy kärhanalary saýlap aldy we olara bu ugurda tälim berdi. Şu maksat bilen, hyzmatlary we önümleri eksport etmek bilen baglanyşykly dürli temalar boýunça 6 sany okuw maslahaty geçirildi. Soňky geçirilen onlaýn duşuşykda Türkmenistandan 9 sany hususy kärhana Merkezi Aziýa ýurtlaryndan 30 sany hyzmatdaşlyk gatnaşyklaryny ýola goýmaga mümkinçilik aldy. Olara öz önümleriniň göwnejaý tanyşdyrylyşyny guramakda bankyň ýörite geňeşçisi ýardam etdi. ÝTÖB häzirki wagtda onlaýn duşuşygyň çäginde alnan teklipleriň üstünde işleýär. Olary durmuşa geçirmegiň mümkinçiliklerine ýakyn 6 aýyň içinde baha berler — diýip, Fatih Türkmenogly belleýär. Onuň belleýşi ýaly, ÝTÖB-iň esasy maksady Türkmenistanda hususy pudagy ösdürmäge ýardam etmek bolup durýar. Bank bu ugurda Türkmenistan bilen gurluşyk we maliýe meseleleri babatda hyzmatdaşlygy giňeltmäge taýýardyr. Şunuň bilen baglylykda, ÝTÖB eýýäm öz önümlerini daşary ýurtlara eksport edýän we indi bu işe başlamakçy bolýan türkmen işewürlerine logistika ugurlaryny yzygiderli seljermekde, täze eksport bazarlaryny gözlemekde we bazaryň üýtgäp durýan şertlerine uýgunlaşmakda degişli maslahat beriş çärelerini we maliýe goldawyny berýär. Türkmenoglunyň aýtmagyna görä, ÝTÖB türkmen hususyýetçileriniň eksport mümkinçiliklerini ýokarlandyrmaga goldaw bermegini mundan beýläk-de dowam etdirer.

Indoneziýada seýrek pyşdyllar halas edildi

gyzgyn — Thu, 19 Jan 2023 18:40:06 +0000

Indoneziýada kyrkdan gowrak ýaşyl deňiz pyşdylyny brakonýerleriň torundan halas etdiler diýip, «Habar 24» ýazýar. Häzir ýurduň kenarýaka suwlary Ýabany tebigatyň bütindünýä gaznasynyň wekilleriniň gözegçiliginde saklanýar. Halas edilen pyşdyllary gözden geçirip, ýene deňze goýberýärler. Soňky ýyllarda bu seýrek ýaşyl pyşbagalaryň sany bikanun awlanylmagy netijesinde azaldy. Olary, esasan, Malaýziýa, Wýetnam we Hytaý ýaly ýurtlara äkidýärler.

«Ýylyň göreldeli wagyzçysy» bäsleşiginiň ýeňijileri belli boldy

gyzgyn — Thu, 19 Jan 2023 18:40:00 +0000

Türkmenistanyň Demokratik partiýasynyň Syýasy Geňeşi tarapyndan geçirilýän «Ýylyň göreldeli wagyzçysy» bäsleşiginiň ýeňijileri belli boldy. Has takygy, bäsleşikde Türkmenistanyň Daşary işler ministrliginiň Halkara gatnaşyklary institutynyň uly mugallymy Perhat Çaryýew ýeňiji boldy. Bu barada ýokary okuw mekdebiniň resmi web-saýtynda habar berilýär. Ýeri gelende bellesek, Türkmenistanyň Demokratik partiýasynyň Syýasy Geňeşi tarapyndan her ýyl yglan edilýän «Ýylyň göreldeli wagyzçysy» bäsleşiginde Türkmenistanyň Prezidentiniň alyp barýan hoşniýetli, parahatçylyk söýüjilikli içeri we daşary syýasatyny, amala aşyrýan özgertmelerini jemgyýetçilige wagyz-nesihat etmekde tapawutlanan Türkmenistanyň raýatlary ýeňiji hökmünde kesgitlenýärler.

Serdar Berdimuhamedow oba hojalyk iş maslahatyny geçirdi

gyzgyn — Thu, 19 Jan 2023 18:39:57 +0000

Şu gün Prezident Serdar Berdimuhamedow Türkmenistanyň oba hojalyk we daşky gurşawy goramak ministriniň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Bu barada «Watan» habarlar gepleşiginde habar berildi. Iş maslahatynda ýurduň welaýatlarynda alnyp barylýan möwsümleýin oba hojalyk işleri bilen baglanyşykly meselelere garaldy. Welaýatlaryň häkimleri şu günler sebitlerdäki ekin meýdanlarynda alnyp barylýan möwsümleýin oba hojalyk işleriniň ýagdaýy, şeýle hem ýurdy durmuş-ykdysady taýdan ösdürmegiň maksatnamalarynda göz öňünde tutulan işleriň durmuşa geçirilişi barada hasabatlary berdiler. Hasabatlarda bugdaý ekilen meýdanlarda ideg işleriniň agrotehnikanyň kadalaryna laýyklykda alnyp barylýandygy, pagtaçy daýhanlary ýokary hilli gowaça tohumlary bilen üpjün etmek üçin degişli çäreleriň geçirilýändigi barada aýdyldy. Hasabatlaryň çäginde häzirki wagtda öňde duran oba hojalyk möwsüminde ulanyljak tehnikalaryň we gurallaryň abatlanylýandygy, ýazlyk ýeralmanyň we beýleki gök-bakja ekinleriniň ekişine taýýarlyk görülýändigi barada-da habar berildi. Türkmenistany durmuş-ykdysady taýdan ösdürmegiň maksatnamasyna hem-de Oba milli maksatnamasyna laýyklykda welaýatlarda meýilleşdirilen işleriň ýerine ýetirilişi barada hem aýdyldy. Häkimler welaýatlarda ýaşaýyş jaýlarynda we medeni-durmuş maksatly binalarda ýyladyş ulgamlaryny kadaly işletmek, ilaty elektrik energiýasy, suw we tebigy gaz bilen bökdençsiz üpjün etmek ugrunda görülýän çäreler barada hem habar berdiler. Prezident Serdar Berdimuhamedow hasabatlary diňläp, oba hojalyk işleriniň agrotehnikanyň kadalaryna laýyklykda geçirilmeginiň geljekki bol hasylyň girewidigini belledi hem-de ol işleriň talabalaýyk guralmagy babatda häkimlere birnäçe anyk tabşyryklary berdi. Döwlet Baştutany bugdaý ekilen meýdanlarda alnyp barylýan ideg işlerine ünsi çekip, bu işleriň agrotehnikanyň kadalaryna laýyklykda ýerine ýetirilmegini hemişe gözegçilikde saklamak babatda-da häkimlere degişli tabşyryklarydyr görkezmeleri berdi. Prezident Serdar Berdimuhamedow welaýatlaryň medeni-durmuş maksatly binalarynyň ýyladyş ulgamlarynyň kadaly işledilmegi hem-de elektrik energiýasy, suw we tebigy gaz bilen bökdençsiz üpjün edilmegi boýunça zerur çäreleriň geçirilmelidigini tabşyrdy. Döwlet Baştutany ýurduň sebitlerini durmuş-ykdysady taýdan ösdürmegiň maksatnamalaryna laýyklykda welaýatlarda gurulmagy meýilleşdirilen medeni-durmuş we önümçilik maksatly desgalardaky gurluşyk işleriniň berk gözegçilikde saklanylmagy, ýokary hilli ýerine ýetirilmegi babatda häkimlere birnäçe degişli tabşyryklary berdi. Iş maslahatynda döwlet Baştutany pagta öndürijileriň ýokary hilli gowaça tohumlary bilen üpjün edilmeginiň, ýazlyk ýeralmanyň we beýleki gök-bakja ekinleriniň ekişine ykjam taýýarlyk görmegiň zerurdygyny belläp, bu babatda häkimlere birnäçe görkezmeleri berdi. Mary welaýatynyň häkimine ýetişdirilen gant şugundyrynyň hasylyny ýitgisiz ýygnap almak babatda-da görkezmeler berildi. Soňra ýurduň oba hojalyk we daşky gurşawy goramak ministri A.Altyýewe söz berildi. Ministr ýurduň welaýatlarynda möwsümleýin oba hojalyk işleriniň barşy barada hasabat berdi. Bellenilişi ýaly, şu günler bugdaý ekilen meýdanlarda ideg işleri agrotehnikanyň talaplaryna laýyklykda alnyp barylýar. Hususan-da, ekini mineral dökünler bilen iýmitlendirmek işleri dowam edýär. Şeýle hem 2023-nji ýylyň hasyly üçin gowaça ekiljek ýerleri ýazky ekiş möwsümine taýýarlamak, hususan-da, ýerleri mineral dökünler bilen gurplandyrmak boýunça degişli işler alnyp barylýar. Şonuň bilen birlikde, ýazky ekiş möwsüminde pagtaçy daýhanlary ýokary hilli gowaça tohumlary bilen üpjün etmek maksadynda, şu günler ministrligiň garamagyndaky pagta arassalaýjy kärhanalarda gowaça tohumlaryny taýýarlamak işleri alnyp barylýar. Şeýle-de ekiş möwsüminde işlediljek tehnikalary we gurallary abatlap, olary möwsüme doly taýýar edip goýmak, welaýatlarda ekilmegi meýilleşdirilýän ýeralmanyň we beýleki gök-bakja ekinleriniň ekiljek ýerlerini taýýarlamak boýunça zerur çäreler görülýär. Döwlet Baştutany hasabaty diňläp, oba hojalyk pudagynyň ýurduň milli ykdysadyýetindäki möhüm ornuna ünsi çekdi hem-de şu günler dowam edýän möwsümleýin oba hojalyk işleriniň, aýratyn-da, bugdaý ekilen meýdanlardaky ideg işleriniň agrotehnikanyň talaplaryny berk berjaý etmek bilen geçirilmeginiň möhüm talap bolup durýandygyny belledi. Şeýle-de gowaça ekiljek meýdanlary taýýarlamak, oba hojalyk işlerinde ulanyljak tehnikalary we gurallary abatlamak boýunça ähli zerur tagallalaryň edilmelidigini nygtady we bu babatda birnäçe anyk tabşyryklary berdi. Prezident Serdar Berdimuhamedow oba hojalyk we daşky gurşawy goramak ministri A.Altyýewe hem-de welaýatlaryň häkimlerine ýüzlenip, möwsümleýin oba hojalyk işleriniň, hususan-da, bugdaýa ideg etmegiň, gowaça ekiljek ýerleri ekişe taýýarlamagyň agrotehnikanyň kadalaryna laýyklykda geçirilmegini talabalaýyk guramak babatda degişli tabşyryklary berdi.

Türkmenistanda saýlaw möwsümine badalga berildi

gyzgyn — Thu, 19 Jan 2023 18:39:55 +0000

Şu gün Türkmenistanda Saýlawlary we sala salşyklary geçirmek boýunça merkezi toparyň nobatdaky mejlisi geçirildi. Ol Mejlisiň ýedinji çagyrylyşynyň deputatlarynyň, welaýat, etrap we şäher halk maslahatlarynyň bäşinji çagyrylyşynyň agzalarynyň, Geňeşleriň dokuzynjy çagyrylyşynyň agzalarynyň saýlawlaryna taýýarlyk görmek baradaky meselelere bagyşlandy. Bu barada «Watan» habarlar gepleşiginde habar berildi.
Mejlise merkezi saýlaw toparlarynyň agzalary, Merkezi saýlaw toparynyň ýanynda döredilen iş toparlarynyň wekilleri, ýurduň syýasy partiýalarynyň, jemgyýetçilik guramalarynyň jogapkär işgärleri, şeýle-de köpçülikleýin habar beriş serişdeleriniň wekilleri gatnaşdylar.
Mejlisiň gün tertibine 2023-nji ýylyň 26-njy martynda boljak saýlawlaryň guramaçylykly geçirilmegi bilen bagly birnäçe meseleler girizildi. Merkezi saýlaw topary saýlawlara taýýarlyk görmek hem-de olary geçirmek boýunça çäreleriň gündelik meýilnamasyny tassyklady.
Türkmenistanyň Saýlaw kodeksine, Türkmenistanda Saýlawlary we sala salşyklary geçirmek boýunça merkezi toparyň kararyna laýyklykda, şu günden - 2023-nji ýylyň 16-njy ýanwaryndan başlap, saýlaw möwsümine badalga berilýändigi yglan edildi. Saýlawlaryň geçirilmegine 60 gün galanda dalaşgärleri teklip etmek işi başlanýar.
Merkezi saýlaw toparynyň karary bilen, Mejlisiň deputatlarynyň saýlawlary boýunça saýlaw okruklarynyň 125-si, şol sanda Aşgabatda 17-si, Ahal welaýatynda 16-sy, Balkan welaýatynda 10-sy, Daşoguz welaýatynda 27-si, Lebap welaýatynda 26-sy, Mary welaýatynda 29-sy döredildi. Bu okruklaryň san belgileri, atlary, merkezleri hem-de araçäkleri baradaky maglumatlar merkezi we ýerli metbugatda çap ediler. Okruklaryň hem-de geňeşlikleriň 5 ýyllyk ygtyýarlyk möhletiniň tamamlanmagy bilen baglylykda, Türkmenistanyň Saýlaw kodeksine laýyklykda, Mejlisiň deputatlarynyň saýlawlary boýunça okruk saýlaw toparlary, şeýle hem Geňeşleriň agzalarynyň saýlawlary boýunça etraplardaky şäherleriň, şäherçeleriň we geňeşlikleriň saýlaw toparlary döredildi.
Saýlaw toparlarynyň düzümine wekiller syýasy partiýalar, jemgyýetçilik guramalary hem-de raýatlaryň toparlary tarapyndan öňe sürüldi. Şeýlelikde, 125 okruk saýlaw toparlary hem-de etraplardaky şäherleriň, şäherçeleriň we geňeşlikleriň 572 sany saýlaw toparlary döredildi. Welaýat halk maslahatlarynyň agzalarynyň saýlawlary boýunça saýlaw okruklarynyň 240-sy, ýagny welaýatlaryň her birinde we Aşgabat şäherinde 40-sy döredildi. Etrap, şäher halk maslahatlarynyň agzalarynyň saýlawlary boýunça etraplaryň we şäherleriň hersinde degişli saýlaw okruklarynyň 20-si, jemi 980-si, Ahal welaýatynda 160, Balkan welaýatynda 180, Daşoguz welaýatynda 160, Lebap welaýatynda 180, Mary welaýatynda 220, Aşgabat şäherinde 80 okruk döredildi.
Türkmenistanda Saýlawlary we sala salşyklary geçirmek boýunça merkezi toparyň binasynda geçirilen mejlisde oňa gatnaşyjylar öňde boljak saýlawlar bilen bagly birnäçe guramaçylyk meselelerini ara alyp maslahatlaşdylar. Zerur resminamalar, şol sanda gollanmalar, gözükdirijiler we synçylar hem-de ýurduň raýatlary üçin dürli maglumatnamalar tassyklandy. Birnäçe saýlaw toparlarynyň agzalary üçin okuw sapaklaryny geçmek meýilleşdirildi. Mejlise gatnaşyjylar saýlawlaryň aýdyňlygyny we giň bäsdeşligini üpjün etmek boýunça möhüm wezipeleri kesgitlediler.
Saýlawlara diňe bir milli synçylar däl-de, halkara bilermenlerdir halkara synçylar-da gözegçilik ederler.

«Türkmenistan» awiakompaniýasynyň pandemiýa sebäpli ýatyrylan halkara uçuşlarynyň petekleriniň möhleti gysgaldyldy

gyzgyn — Thu, 19 Jan 2023 18:39:53 +0000

«Türkmenistan» awiakompaniýasy pandemiýa sebäpli ýatyrylan halkara uçuşlaryň petekleriniň möhletini gysgaltdy. Petekleri 2023-nji ýylyň 28-nji fewralyna çenli çalşyp bolýar. Bu barada «Orient» habar berýär. Howa petekleri gidilýän ýurda baglylykda täzesine çalşyp bolýar. Meselem, eger-de ýolagçynyň Aşgabatdan Sankt-Peterburga ýatyrylan uçara petegi bar bolsa, ol ony Aşgabatdan Moskwa ýa-da Kazana tölegsiz çalşyp bilýär. Petekleri Türkmenistanyň heniz uçuşlary ýola goýmadyk ýurtlaryna çalyşmak mümkin däldir. Şunda 1-nji martdan başlap, ähli ýolagçylaryň ozal satyn alnan peteklere tölenen pullaryny hiç hili tutumsyz yzyna gaýtaryp almaga mümkinçiligi bolar. Ozal 2020-nji ýylyň 20-nji martyna çenli satyn alnan petekleri 2023-nji ýylyň 25-nji martyna çenli çalşyp bolýardy. «Türkmenistan» awiakompaniýasy häzirki wagtda Aşgabatdan Dubaýa (BAE), Maýn boýundaky Frankfurta (Germaniýa), Stambula (Türkiýe), Kazana (Tatarstan, RF) we Moskwa (RF) göni yzygiderli gatnawlary amala aşyrýar.

Hünärmen gyşyna saçyň elektrizasiýalaşmagynyň öňüni almagy maslahat berdi

gyzgyn — Sun, 15 Jan 2023 01:23:49 +0000

Russiýadaky «19 Lab Professional» gözellik brendini esaslandyryjy Walentina Gluşkowa «Gazeta.ru» neşirine gyşyna saç ýuwulanda, elektrizasiýalaşmagynyň öňüni almagyň ýollaryny salgy berdi. Onuň aýtmagyna görä, munuň üçin saçyňy biraz mylaýym suwa ýuwmak gerek. «Saçyňy mineral suwa durlamak peýdaly bolar» diýip, Gluşkowa aýtdy. Ol şeýle-de süpürgiç saýlamak meselesine ünsi çekdi hem-de wafiýa nagyşly, pagta ýa-da inçe süýümli süpürgiçleri maslahat berdi. Mundan başga-da düzümine pantenol, proteinler, elastin, kollagen we keratin girýän şampunlary ulanmak peýdaly bolar.

Türkmenistanyň ýetginjekler we ýaşlar zenanlar ýygyndylary Aşgabatda türgenleşýärler

gyzgyn — Sun, 15 Jan 2023 01:23:47 +0000

Aziýa Kubogy – 2024-iň saýlama tapgyryna taýýarlygyň çäginde ýetginjeklerden (U17) hem-de ýaşlardan (U20) düzülen Türkmenistanyň zenanlar ýygyndy toparlarynyň gatnaşmagynda paýtagtyň Olimpiýa şäherçesiniň türgenleşik meýdanynda okuw-türgenleşik ýygnanyşygy geçirilýär. Bu barada Türkmenistanyň Futbol federasiýasy habar berdi. 14-nji ýanwara çenli dowam etjek okuw-türgenleşik ýygnanyşygynyň dowamynda Kamil Mingazowyň ýolbaşçylygyndaky tälimçiler düzümi iki ýaş derejesindäki ýygyndylaryň hataryna çagyryljak oýunçylary gözden geçirerler. Ýeri gelende bellesek, okuw-türgenleşik ýygnanyşygy Türkmenistanyň ähli künjeklerinden gelen oýunçylaryň gatnaşmagynda geçirilýär. Yklym ýaryşyna taýýarlyk görýän ýygyndy toparynyň türgenleşik ýygnanyşygynyň Türkmenistanyň Futbol federasiýasynyň guramagynda geçirilýändigini bellemek gerek. Ýetginjekler (U17) hem-de ýaşlar (U20) zenanlar ýygyndy toparlarynyň 2023-nji ýylda ýylda geçiriljek Aziýa Kubogy – 2024-iň saýlama tapgyrynda çykyş ederler. Türkmenistanyň 20 ýaşa çenli ýaşlardan düzülen zenanlar ýygyndysy (U20) Aziýa Kubogy – 2024-iň saýlama tapgyrynda «H» toparçada bäsleşer. Geçirilen bije çekişligiň netijesinde Türkmenistanyň ýaşlar ýygyndysynyň garşydaşlary Eýranyň hem-de Bangladeşiň ýygyndylary bolar. Saýlama tapgyryň duşuşyklary 2023-nji ýylyň 6-12-nji martynda geçiriler. Bu toparçanyň duşuşyklarynyň merkezleşdirilen görnüşinde Bangladeşde geçirilmegine garaşylýar. Türkmenistanyň 17 ýaşa çenli ýetginjeklerden düzülen zenanlar ýygyndysy (U17) bolsa Aziýa Kubogy – 2024-iň saýlama tapgyrynda «D» toparçada çykyş etmäge mümkinçilik aldy. Türkmenistanyň ýetginjekler ýygyndysynyň garşydaşlary Bangladeşiň, Singapuryň hem-de BAE-niň ýygyndy toparlary boldular. Saýlama tapgyryň birinji aýlawynyň duşuşyklary 2023-nji ýylyň 22-30-njy aprelinde geçiriler. Bu toparçanyň duşuşyklarynyň merkezleşdirilen görnüşinde Singapurda geçirilmegine garaşylýar.

Türkmenistan Özbegistan bilen ýeralma tohumçylygy boýunça hyzmatdaşlyk eder

gyzgyn — Sun, 15 Jan 2023 01:23:45 +0000

Türkmenistan Özbegistan Respublikasy bilen oba hojalygy pudagyndaky hyzmatdaşlygyň gerimini giňeldýär. Şunuň bilen baglylykda, Rejep Meredowyň ýolbaşçylygyndaky türkmen wekiliýeti Özbegistana sapar bilen bardy diýip, özbek elektron neşirleri habar berdi. Bellenilişi ýaly, wekiliýetiň düzümine Türkmenistanyň Oba hojalygy we daşky gurşawy goramak ministrliginiň wekilleri girýärler. 2023-nji ýylyň 7 — 14-nji ýanwary aralygynda meýilleşdirilen bir hepdelik saparyň dowamynda olar Türkmenistanda mundan beýläk ösdürip ýetişdirmek üçin pagtanyň irki we inçe süýümli görnüşlerini öwrenerler. Mundan başga-da, saparyň meýilnamasynda özbek hünärmenleri bilen bagçylyk boýunça tejribe alyşmak hem-de ýeralma tohumçylygy babatda hyzmatdaşlyga başlamak göz öňünde tutuldy diýip, çeşme habar berýär. Saparyň çäklerinde özbek hünärmenleri türkmen wekiliýetini ýurtda tohum önümçiligi pudagynda alnyp barylýan işler bilen tanyşdyrdylar, şeýle hem Buhara sebitinde ösdürilip ýetişdirilýän ýokary hasylly, ir ýetişýän, ýokary süýümli pagta görnüşleriniň mümkinçilikleri barada gürrüň berdiler. Mundan başga-da, türkmen wekiliýeti Italiýadan getirilen häzirki zaman tehnologiýalara esaslanýan süýdi gaýtadan işleýän zawoda baryp gördüler.

Türkmenistan we Fransiýanyň işewür toparlary hyzmatdaşlygy ösdürmek bilen baglanyşykly köp sanly meseläni ara alyp maslahatlaşdylar

gyzgyn — Sun, 15 Jan 2023 01:23:43 +0000

Fransiýanyň Söwda palatasynyň başlangyjy bilen öňdebaryjy fransuz kompaniýalarynyň wekilleriniň hem-de Türkmenistanyň bu ýurtdaky ilçihanasynyň wekilleriniň gatnaşmagynda günortanlyk naharynyň başynda duşuşyk geçirildi. Duşuşyga «VINCI Construction», «CARPI Tech», «MEDEF International», «SAFRAN», «PMJC», «CIS Energy», «IN Groupe», «Thomson Broadcast», «Oberthur», «Airbus D&S», «Saberatours» ýaly kompaniýalaryň wekilleri gatnaşdylar. Duşuşyk oňa gatnaşyjylara Türkmenistan bilen Fransiýanyň arasyndaky söwda we ykdysady gatnaşyklary ösdürmäge gönükdirilen köp sanly meseläni, şeýle hem ösüşi üçin geljegi uly ugurlary ara alyp maslahatlaşmaga mümkinçilik berdi. Türkmenistanyň ilçisi Maksat Çaryýew, fransuz tarapyna Türkmenistanda döredilen amatly şertler barada maglumat berdi we maýa goýum taslamalarynyň durmuşa geçirilmegine işjeň gatnaşmagy teklip etdi. Maýa goýum ugurlary üçin himiýa senagaty, gaz we nebithimiýa, dokma senagaty we oba hojalygy ýaly ugurlar teklip edilýär. Şeýle hem ilçi daşary ýurt maýasynyň gatnaşmagynda durmuşa geçirmek üçin meýilleşdirilýän taslamalary anyk kesgitleýän pudaklaýyn ösüş maksatnamalary barada aýtdy. Ilçi Türkmenistanyň çäginde türkmen kompaniýalary, şol sanda IT kompaniýalary bilen bilelikdäki kärhanalary döretmegi teklip etdi. Türkmenistan Döwlet gümrük gullugynyň wekili S.Berdiýew ýygnananlara Türkmenistanda eksport we import şertnamalaryny hasaba almagyň tertibi barada gürrüň berdi. Duşuşygyň barşynda fransuz işewürleriniň wekilleri özlerini gyzyklandyrýan soraglaryna giňişleýin jogap aldylar. Türkmenistanyň Pariždäki ilçihanasynyň metbugat gullugynyň habaryna görä, günortanlyk naharynyň başynda fransuz telekeçileri bilen hemişelik gepleşik gurmak üçin şeýle çäreleri geçirmegi yzygiderli dowam etdirmek kararyna gelindi.

Türkmen ilçisi Özbegistanyň daşary syýasat edarasynda kabul edildi

gyzgyn — Sun, 15 Jan 2023 01:23:41 +0000

Türkmenistanyň Özbegistandaky Adatdan daşary we Doly ygtyýarly ilçisi Ýazguly Mämmedow ýurduň daşary işler ministriniň wezipesini wagtlaýyn ýerine ýetiriji Bahtiýor Saidow bilen duşuşdy. Düýn geçirilen duşuşykda dostlukly türkmen-özbek gatnaşyklaryny, we strategik hyzmatdaşlygy has-da çuňlaşdyrmagyň möhüm meselelerine garaldy diýip, Özbegistanyň daşary syýasat edarasy habar berýär. Bellenilişi ýaly, duşuşygyň dowamynda ikitaraplaýyn amala aşyrylan ýokary derejeli saparlaryň netijesinde gazanylan ylalaşyklaryň hemmetaraplaýyn durmuşa geçirilişine aýratyn üns berildi. Şol sanda iki ýurduň arasynda diplomatik gatnaşyklaryň ýola goýulmagynyň 30 ýyllygynyň bellenilmeginiň çäklerindäki çäreleriň tertibi boýunça pikir alşyldy. Taraplar duşuşykda iki ýurduň arasyndaky söwda dolanyşygynyň görkezijilerini ýokarlandyrmak, söwda we senagat hyzmatdaşlygy ugurlarynda bilelikdäki taslamalaryň durmuşa geçirilmegini çaltlaşdyrmak üçin ýörite teklipleri ara alyp maslahatlaşdylar. Türkmen ilçisi duşuşykda Türkmenistanyň medeni we ynsanperwer gatnaşyklary güýçlendirmäge taýýardygyny mälim etdi.

ÝB-da ýumurtga we däne önümleri 40 göterimden gowrak gymmatlady

gyzgyn — Sun, 15 Jan 2023 01:23:39 +0000

Ýewropa Bileleşiginde ýumurtga we däne önümleri geçen 2022-nji ýylda 40 göterimden hem gowrak gymmatlady diýip, TASS habarlar gullugy Ýewropanyň Statistika wekilhanasyna salgylanyp habar berdi. Bu barada «Belta.by» saýty ýazýar. Habarda ÝB-da oba hojalyk önümleriniň umumy 24 göterim derejede gymmatlandygy aýdylýar. Ählisinden däne (45 göterim), ýumurtga (43 göterim), şeýle-de süýt önümleri (31 göterim) gymmatlady. Şol bir wagtda häzir miweleriň 3 göterim arzanlandygy aýdylýar. Ýewrostat edarasynyň bellemegine görä, nyrhlaryň ýokarlanmagyna dünýäde dowam edýän harby gapma-garşylyklardyr guraklyk sebäp boldy.

Türkmenistan yslam ýurtlarynyň we Tatarystanyň toparlarynyň arasyndaky hokkeý ýaryşyna gatnaşar

gyzgyn — Sun, 15 Jan 2023 01:23:38 +0000

2023-nji ýylyň 14-17-nji ýanwary aralygynda Kazanda yslam ýurtlarynyň we Tatarystan Respublikasynyň toparlarynyň arasynda ilkinji hokkeý ýaryşy geçiriler. Ýaryşa Türkmenistanyň hokkeý boýunça erkekler ýygyndysy hem gatnaşar diýlip, «ak-bars.ru» web sahypasynda habar berilýär. Ýaryşa erkekleriň 12 sany we zenanlaryň 5 sany höwesjeň toparlary gatnaşarlar. Erkekleriň arasynda geçiriljek duşuşyklarda Birleşen Arap Emirlikleriniň, Saud Arabystanynyň, Eýranyň, Omanyň, Bahreýniň, Gazagystanyň, Özbegistanyň, Gyrgyzystanyň, şeýle hem Alžiriň, Marokkonyň we Liwanyň oýunçylarynyň birleşen hokkeý ýygyndylary ýaryşarlar. Zenanlaryň arasynda Tatarystandan, Eýrandan, Birleşen Arap Emirliklerinden, Saud Arabystanyndan we Bahreýnden gelen türgenler bäsleşer. Ýaryşyň açylyş oýny 14-nji ýanwarda geçiriler.

Uýasy Jeremi Renneriň saglygy barada gürrüň berdi

gyzgyn — Sun, 15 Jan 2023 01:23:36 +0000

Gar arasalaýjy enjamyň aşagyna düşüp, agyr ýaralanan aktýor Jeremi Renneriň saglygy barada onuň maşgalasy gürrüň berdi diýip, «Fox News» habarlar gullugyna salgylanýan «Gazeta.ru» ýazýar. Aktýoryň 52 ýaşly aýal dogany Kimiň aýtmagyna görä, Renneriň saglygy çalt dikelýär. «Eger siz Jeremini tanaýan bolsaňyz, ol hakyky batyr. Ol garaşanymyzdan tiz gutulýar» diýip, uýasy nygtady. Ýeri gelende aýtsak, 51 ýaşly aktýor 1-nji ýanwarda dikuçarda Newada ştatyndaky hassahana eltilipdi. Ol öz ulagyny gardan arassalamakçy bolanda, gar arassalaýjy enjamyň çarhyna düşüpdi, şol wagt enjamy onuň maşgalasynyň agzalarynyň biri dolandyrýardy. Netijede, oňa döş kapasasyna we aýagyna operasiýa etmeli boldy. Şeýle-de okaň: Aktýor Jeremi Renner agyr şikes aldy

Hytaý dünýäde ilkinji ekologik taýdan arassa ýolagçy otlusyny işe goýberdi

gyzgyn — Sun, 15 Jan 2023 01:23:34 +0000

Hytaýda dünýäde ekologik taýdan arassa ilkinji ýolagçy otlusy hereket edip başlady, ol «wodorod energiýasy» ulgamynda işleýär diýip, «Report.az» ýazýar. «Fuel Cells Works» neşiriniň ýazmagyna görä, ýurduň Sinzýan ülkesindäki «Chengdu CRRC Changchun» kärhanasynda öndürilen dünýädäki ilkinji şäher otlusy wodorodda işleýär. Täze otlynyň tizligi 160km/sag deň bolup, ol bir gezek güýç berlende 600 kilometri geçmäge ukyplydyr. Otly ekologik taýdan arassa bolup, kömürturşy gazyny düýbünden bölüp çykarmaýar. Oňa şeýle-de howpsuzlygy üpjün edýän emeli aň ulgamy ornaşdyrylandyr.

Türkmenistanyň hokkeý ýygyndysy Tatarystana bardy

gyzgyn — Sun, 15 Jan 2023 01:23:31 +0000

Türkmenistanyň hokkeý boýunça milli ýygyndysy yslam döwletleriniň we Tatarystan Respublikasynyň arasynda geçiriljek hokkeý boýunça halkara ýaryşa gatnaşmak üçin şu gün irden Kazan şäherine bardy. Şäherdäki howa menzilinde türkmen ýygyndysy myhmansöýerlik bilen kabul edildi. Ýaryşyň BAE-niň, Saud Arabystanynyň, Eýranyň, Omanyň, Bahreýniň, Gazagystanyň, Türkmenistanyň, Özbegistanyň, Gyrgyzystanyň we Alžiriň, Marokkonyň hem-de Liwanyň birleşen erkekler ýygyndylarynyň arasynda geçiriljekdigini ýatladýarys. Tatarystanyň ýygyndysyna «Ak Bars» toparynyň we ýurduň weteran hokkeýçileri wekilçilik eder. Ýaryşyň açylyş duşuşygy 14-nji ýanwarda bolar. Gündiz sagat 13:00-da başlanjak açylyş dabarasynda Elmira Kalimullina, Marat Ýarullin we «Kazan Nury» halk saz gurallary topary çykyş eder. Türkmenistanyň ýygyndysy Tatarystanyň, Gyrgyzystanyň we Gazagystanyň ýygyndylary bilen bir toparçada ýaryşar.

Serdar Berdimuhamedow sanly ulgam arkaly Hökümet mejlisini geçirdi

gyzgyn — Sun, 15 Jan 2023 01:23:29 +0000

Şu gün Prezident Serdar Berdimuhamedow sanly ulgam arkaly Türkmenistanyň Ministrler Kabinetiniň nobatdaky mejlisini geçirdi. Bu barada «Watan» habarlar gepleşiginde habar berildi. Bellenilişi ýaly, mejlisde döwlet durmuşyna degişli möhüm meseleler ara alnyp maslahatlaşyldy hem-de käbir resminamalaryň taslamalaryna garaldy. Mejlisiň barşynda, ilki bilen, Türkmenistanyň Milli Geňeşiniň Mejlisiniň Başlygy G.Mämmedowa hem-de Halk Maslahatynyň Başlygynyň orunbasary K.Babaýew döwletiň kanunçylyk-hukuk binýadyny kämilleşdirmek boýunça ýerine ýetirilýän işler, durmuşa geçirilýän çäreler hakynda maglumat berdiler. Şunda ykdysady işiň hukuk esaslaryny, şeýle hem döwlet we jemgyýetçilik durmuşynyň beýleki ugurlaryny berkitmäge ýardam edýän kanunlaryň işlenip taýýarlanylýandygy, hereket edýän hukuk namalarynyň kämilleşdirilýändigi, 11-nji ýanwarda geçirilen Milli Geňeşiň palatalarynyň bilelikdäki maslahatynda kabul edilen çözgütler, olary ýerine ýetirmek ugrunda ýurduň dürli ulgamlarynda degişli çäreleriň geçirilýändigi, şeýle hem şu ýyl Mejlisiň ýedinji çagyrylyşynyň deputatlarynyň, welaýat, etrap we şäher halk maslahatlarynyň bäşinji çagyrylyşynyň agzalarynyň, Geňeşleriň dokuzynjy çagyrylyşynyň agzalarynyň saýlawlaryna taýýarlyk görülýändigi, milli kanunçylyk ulgamyny kämilleşdirmekde, halk häkimiýetliliginiň dabaralanmagynda Halk Maslahatynyň Başlygy Gurbanguly Berdimuhamedowyň tagallalary, ýurduň sebitlerinde iş saparlarynda bolup, halkyň ýaşaýyş-durmuş derejesi, dürli kärlerde zähmet çekýän raýatlaryň hal-ýagdaýlary, alyp barýan işleri bilen ýakyndan tanyşýandygy, deputatlaryň gatnaşýan çäreleri, şol sanda kabul edilýän kanunlaryň many-mazmunyny ilata düşündirmek boýunça geçirýän wagyz-nesihat işleri barada aýdyldy. Prezident Serdar Berdimuhamedow 21-nji ýanwarda Aşgabatdaky Maslahat köşgünde geçiriljek, ýurduň durmuşynda möhüm waka boljak Türkmenistanyň Milli Geňeşiniň Halk Maslahatynyň we Mejlisiniň jemgyýetçilik wekilleriniň gatnaşmagyndaky bilelikdäki maslahatyny ýokary guramaçylyk derejesinde geçirmek üçin ähli tagallalary etmegiň zerurdygyna ünsi çekdi. Hökümet mejlisinde wise-premýerler hem-de Ministrler Kabinetiniň ýanyndaky Ulag we kommunikasiýalar agentliginiň Baş direktory gözegçilik edýän düzümlerinde alnyp barylýan işler, şol sanda pudaklary mundan beýläk-de ösdürmek boýunça wezipeleriň ýerine ýetirilişi, öňde boljak çärelere taýýarlyk görlüşi barada hasabatlary berdiler. Döwlet Baştutany hasabatlary diňläp, ýurduň dürli toplumlarynda, milli ykdysadyýetiň pudaklarynda alnyp barylýan işler, öňde boljak çäreler, pudaklary ösdürmek ugrundaky wezipeler bilen baglylykda, degişli ýolbaşçylara anyk tabşyryklary berdi.

Wise-premýer Ş.Abrahmanowa berk käýinç yglan edildi

gyzgyn — Sun, 15 Jan 2023 01:23:27 +0000

Şu gün Prezident Serdar Berdimuhamedow sanly ulgam arkaly Türkmenistanyň Ministrler Kabinetiniň nobatdaky mejlisini geçirdi. Mejlisiň barşynda Türkmenistanyň Prezidenti Serdar Berdimuhamedow degişli Buýruga gol çekdi. Resminama laýyklykda, wezipe borçlaryny talabalaýyk ýerine ýetirmän, işde goýberen düýpli kemçilikleri üçin, Ministrler Kabinetiniň Başlygynyň orunbasary Şahym Abdrahmanowa berk käýinç yglan edildi. Bu barada «Watan» habarlar gepleşiginde habar berildi. Bellenilişi ýaly, döwlet Baştutany ýol berlen kemçilikler gysga wagtyň içinde düzedilmese, eýeleýän wezipesinden boşadyljakdygyny wise-premýer Ş.Abdrahmanowa soňky gezek duýdurdy.

Wise-premýer Ç.Purçekowa kemçilikleri gysga wagtda düzetmek soňky gezek duýduryldy

gyzgyn — Sun, 15 Jan 2023 01:23:25 +0000

Türkmenistanyň Ministrler Kabinetiniň şu gün sanly ulgam arkaly geçirilen nobatdaky mejlisiniň barşynda Türkmenistanyň Prezidenti Serdar Berdimuhamedow degişli Buýruga gol çekdi hem-de wezipe borçlaryny talabalaýyk ýerine ýetirmän, işde goýberen düýpli kemçilikleri üçin, Ministrler Kabinetiniň Başlygynyň orunbasary Çarymyrat Purçekowa berk käýinç yglan etdi. Bu barada «Watan» habarlar gepleşiginde habar berildi. Bellenilişi ýaly, döwlet Baştutany ýol berlen kemçilikler gysga wagtyň içinde düzedilmese, eýeleýän wezipesinden boşadyljakdygyny wise-premýer Ç.Purçekowa soňky gezek duýdurdy.

«Türkmengaz» döwlet konserniniň başlygyna berk käýinç berildi

gyzgyn — Sun, 15 Jan 2023 01:23:24 +0000

Türkmenistanyň Ministrler Kabinetiniň şu gün sanly ulgam arkaly geçirilen nobatdaky mejlisiniň barşynda Türkmenistanyň Prezidenti Serdar Berdimuhamedow degişli Buýruga gol çekdi. Resminama laýyklykda, wezipe borçlaryny talabalaýyk ýerine ýetirmän, işde goýberen düýpli kemçilikleri üçin, Döwlet ministri — «Türkmengaz» döwlet konserniniň başlygy Amanow Batyr Amangeldiýewiçe berk käýinç yglan edildi hem-de ýol berlen kemçilikleri gysga wagtyň içinde düzetmek oňa soňky gezek duýduryldy. Bu barada «Watan» habarlar gepleşiginde habar berildi.

Düýpli kemçilikleri üçin, «Türkmenhimiýa» döwlet konserniniň başlygy berk käýinç aldy

gyzgyn — Sun, 15 Jan 2023 01:23:22 +0000

Şu gün sanly ulgam arkaly geçirilen Türkmenistanyň Ministrler Kabinetiniň nobatdaky mejlisiniň barşynda Prezident Serdar Berdimuhamedow degişli Buýruga gol çekdi. Resminama laýyklykda, wezipe borçlaryny talabalaýyk ýerine ýetirmän, işde goýberen düýpli kemçilikleri üçin, «Türkmenhimiýa» döwlet konserniniň başlygy Nyýazlyýew Nyýazly Myradowiçe berk käýinç yglan edildi hem-de ýol berlen kemçilikleri gysga wagtyň içinde düzetmek oňa soňky gezek duýduryldy. Bu barada «Watan» habarlar gepleşiginde habar berildi.

«Türkmenaragatnaşyk» «Huawei» kompaniýasy bilen şertnama baglaşar

gyzgyn — Sun, 15 Jan 2023 01:23:20 +0000

Ozal habar berşimiz ýaly, şu gün Prezident Serdar Berdimuhamedow sanly ulgam arkaly Türkmenistanyň Ministrler Kabinetiniň nobatdaky mejlisini geçirdi. Mejlisiň barşynda täze taryhy döwürde «Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasyny» ýerine ýetirmekde alnyp barylýan işleri has-da kämilleşdirmek maksady bilen, döwlet Baştutany degişli Karara gol çekdi. Resminama laýyklykda, Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenaragatnaşyk» agentligine ýurduň welaýatlarynda we Aşgabat şäherinde fiksirlenen telefon toruny giňeltmek bilen baglanyşykly enjamlary, programma üpjünçiliklerini we ygtyýarnamalary satyn almak, getirmek, gurnamak, işe girizmek hem-de tehniki goldawy bermek barada Hytaý Halk Respublikasynyň «Huawei Technologies Co., Ltd.» kompaniýasy bilen şertnama baglaşmaga ygtyýar berildi.

TDYDI-de 2 sany halkara internet olimpiadasyny geçirmek meýilleşdirilýär

gyzgyn — Sun, 15 Jan 2023 01:23:18 +0000

Habar berşimiz ýaly, şu gün Prezident Serdar Berdimuhamedow sanly ulgam arkaly Türkmenistanyň Ministrler Kabinetiniň nobatdaky mejlisini geçirdi. Mejlisiň barşynda wise-premýer N.Amannepesow ýurduň ýokary okuw mekdeplerinde halkara olimpiadalary geçirmäge görülýän taýýarlyk barada hasabat berdi. Bellenilişi ýaly, şol halkara olimpiadalaryň 2-si Türkmen döwlet ykdysadyýet we dolandyryş institutynda geçiriler. Has takygy, bu ýokary okuw mekdebinde 2023-nji ýylyň 12-nji aprelinde makroykdysadyýet, 16-njy maýynda dünýä ykdysadyýeti dersleri boýunça Açyk halkara internet olimpiadasyny sanly ulgam arkaly geçirmek meýilleşdirilýär. Halkara olimpiadalara Türkmenistanyň ýokary okuw mekdepleriniň talyplaryndan başga-da, Russiýa Federasiýasynyň, Amerikanyň Birleşen Ştatlarynyň, Hytaý Halk Respublikasynyň, Italiýa Respublikasynyň, Rumyniýanyň, Türkiýe Respublikasynyň, Hindistan Respublikasynyň, Belarusuň, Özbegistanyň, Gazagystan Respublikasynyň we beýleki onlarça döwletiň ýokary okuw mekdepleriniň talyplarynyň gatnaşmagyna garaşylýar. Prezident Serdar Berdimuhamedow hasabaty diňläp, amala aşyrylýan ýaşlar syýasatynyň esasy maksadynyň ýaş nesliň ukyp-başarnyklaryny, döredijilik we ruhy mümkinçiliklerini döwletiň hem-de jemgyýetiň bähbitleriniň durmuşa geçirilmegine gönükdirmekden ybaratdygyny aýtdy. Bu babatda ýurtda dünýä ölçeglerine laýyk gelýän ýokary hilli bilim almak üçin has oňaýly şertleriň döredilýändigi nygtaldy. Döwlet Baştutany wise-premýere meýilleşdirilen halkara olimpiadalaryň ýokary guramaçylyk derejesinde geçirilmegini üpjün etmegi tabşyrdy.

Türkmenistanda gaz saklamak üçin niýetlenen ýerasty desgalar gurlar

gyzgyn — Sun, 15 Jan 2023 01:23:16 +0000

Bu barada şu gün sanly ulgam arkaly geçirilen Hökümet mejlisinde wise-premýer Ş.Abdrahmanowyň hasabatynda aýdyldy. Ministrler Kabinetiniň Başlygynyň orunbasary Ş.Abdrahmanow hasabatynda harytlyk gazyň ätiýaçlyk gorlaryny üpjün etmek maksady bilen, ýurtda gaz saklamak üçin niýetlenen ýerasty desgalary gurmak boýunça alnyp barylýan işler barada döwlet Baştutanyna habar berdi. Bellenilişi ýaly, Türkmenistanda şeýle taslamany ilkinji gezek durmuşa geçirmegiň meýilleşdirilýändigini nazara alyp, bu işi halkara tejribä laýyklykda ýola goýmak we alyp barmak, onuň tehniki-ykdysady esaslandyrmasyny taýýarlamak, taslamalaşdyrmak, enjamlaşdyrmak hem-de gurmak babatda halkara maslahatçy kompaniýalary işe çekmek meýilleşdirilýär. Prezident Serdar Berdimuhamedow hasabaty diňläp, gaz serişdelerini rejeli we netijeli ulanmagyň wajypdygyna ünsi çekdi we bu ugurda ygtybarly hyzmatdaşlygy mundan beýläk-de ösdürmek boýunça çäreleri görmegiň zerurdygyny nygtady.

Türkmenistanda B-92 kysymly awiabenzin öndürilip başlandy

gyzgyn — Sun, 15 Jan 2023 01:23:14 +0000

Bu barada şu gün sanly ulgam arkaly geçirilen Hökümet mejlisinde aýdyldy. Mejlisiň barşynda wise-premýer Ş.Abdrahmanow hasabatynyň çäklerinde «Türkmennebit» döwlet konserniniň Türkmenbaşydaky nebiti gaýtadan işleýän zawodlar toplumynyň öndürýän nebit önümleriniň görnüşlerini artdyrmak boýunça alnyp barylýan işler barada hem aýdyp, döwlet Baştutanyna täze, daşary ýurtlardan getirilýän harytlaryň ornuny tutýan önümiň — B-92 kysymly awiabenziniň öndürilip başlanandygy baradaky hoş habary ýetirdi. Hasabatda bellenilişi ýaly, Türkmenbaşydaky nebiti gaýtadan işleýän zawodlar toplumy hem-de Türkmenistanyň Ylymlar akademiýasynyň Tehnologiýalar merkezi tarapyndan bilelikde önümiň bu görnüşini öndürmek boýunça tehniki şertler işlenip taýýarlanyldy we degişli işler ýerine ýetirildi. Prezident Serdar Berdimuhamedow hasabaty diňläp, bu möhüm ugurda geçirilýän işleriň wajypdygyny belledi hem-de milli ykdysadyýetiň esasy pudaklarynyň biri hökmünde ýangyç-energetika toplumyny hemmetaraplaýyn ösdürmegiň zerurdygyny nygtady.

Türkmenistanda fiksirlenen telefon tory döwrebap GPON ulgamyna çenli kämilleşdiriler

gyzgyn — Sun, 15 Jan 2023 01:23:12 +0000

13-nji ýanwarda geçirilen Hökümet mejlisinde Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew sanly ulgama geçmekde öňdebaryjy tehnologiýalary ornaşdyrmak, aragatnaşyk ulgamlaryny giňeltmek we elýeterliligi üpjün etmek boýunça görülýän çäreler barada hasabat berdi. Bellenilişi ýaly, ýurduň welaýatlarynda we Aşgabat şäherinde sanly telefon beketleri gurnalyp, bir ulgamyň üsti bilen dolandyrylýan telefon, ýokary tizlikli internet we IP telewideniýe ulgamlarynyň hyzmatlaryndan peýdalanmaga mümkinçilik berýän fiksirlenen telefon toruny döwrebap GPON ulgamyna çenli kämilleşdirmek, olaryň göwrümlerini giňeltmek boýunça işler alnyp barylýar. Şunuň bilen baglylykda, mejlisiň barşynda döwlet Baştutanynyň garamagyna degişli Kararyň taslamasy hödürlenildi. Prezident Serdar Berdimuhamedow hasabaty diňläp, aragatnaşyk ulgamyndaky ähli işleri hil taýdan täze derejede utgaşdyrmagyň, bar bolan kuwwatdan netijeli peýdalanmagyň zerurdygyny nygtady. Döwlet Baştutany degişli Karara gol çekip, ony sanly ulgam arkaly agentligiň ýolbaşçysyna iberdi we oňa resminamada göz öňünde tutulan wezipeleri ýerine ýetirmek boýunça anyk çäreleri görmegi tabşyrdy.

20-nji martda Türkmenistanda syýahatçylyk boýunça halkara maslahat geçiriler

gyzgyn — Sun, 15 Jan 2023 01:23:10 +0000

Ozal habar berşimiz ýaly, şu gün Prezident Serdar Berdimuhamedow sanly ulgam arkaly Türkmenistanyň Ministrler Kabinetiniň nobatdaky mejlisini geçirdi. Mejlisiň barşynda M.Mämmedowa «Türkmenistanda syýahatçylygy ösdürmegiň esasy ugurlary we mümkinçilikleri» atly halkara maslahaty geçirmäge görülýän taýýarlyk barada hasabat berdi. Bellenilişi ýaly, milli taryhy-medeni mirasyň obýektlerini aýap saklamagyň, goramagyň, öwrenmegiň hem-de olara syýahatçylary çekmegiň 2022 — 2028-nji ýyllar üçin Döwlet maksatnamasyny durmuşa geçirmek, türkmen halkynyň baý taryhy-medeni mirasyny giňden wagyz etmek maksady bilen, 2023-nji ýylyň 20-nji martynda «Türkmenistanda syýahatçylygy ösdürmegiň esasy ugurlary we mümkinçilikleri» atly halkara maslahaty geçirmek meýilleşdirilýär. Halkara forumyň barşynda daşary ýurtly myhmanlary «Awaza» milli syýahatçylyk zolagy, Türkmenistanyň özboluşly taryhy-medeni, tebigy ýadygärlikleri, muzeýleri we syýahatçylyk mümkinçilikleri bilen tanyşdyrmak, ýurtda Milli bahar baýramy — Halkara Nowruz güni mynasybetli geçiriljek çärelere gatnaşdyrmak göz öňünde tutulýar. Şeýle-de maslahata gatnaşyjylara täze syýahatçylyk ugurlaryny işläp taýýarlamak boýunça özara pikir alyşmak mümkinçiligi dörediler. Bulardan başga-da, syýahatçylyk kärhanalarynyň arasynda hyzmatdaşlyk etmek hakyndaky resminamalara gol çekmek meýilleşdirilýär. Prezident Serdar Berdimuhamedow hasabaty diňläp, halkara hyzmatdaşlygy ösdürmegiň esasy şertleri bolup durýan hem-de Türkmenistanyň dost-doganlyk, ynsanperwerlik we hoşmeýillilik ýörelgelerine ygrarlydygyny aýdyň görkezýän döwrebap syýahatçylyk ulgamyny ösdürmegiň ähmiýetini belledi. Döwlet Baştutany ýurduň syýahatçylyk pudagynyň gazanýan üstünliklerine we kuwwatyna bagyşlanan iri çäreleriň geçirilmeginiň Türkmenistanyň dünýä giňişligindäki abraýynyň has-da belende galmagyna hem-de bu ugurda halkara hyzmatdaşlygy giňeltmäge ýardam etmelidigini nygtap, wise-premýere forumy ýokary guramaçylyk derejesinde geçirmek babatda anyk tabşyryklary berdi.

Aşgabatda aprel aýynda III Açyk halkara matematika olimpiadasy geçiriler

gyzgyn — Sun, 15 Jan 2023 01:23:08 +0000

Türkmenistanyň Ministrler Kabinetiniň şu gün sanly ulgam arkaly geçirilen nobatdaky mejlisinde wise-premýer N.Amannepesow ýurduň ýokary okuw mekdeplerinde halkara olimpiadalary geçirmäge görülýän taýýarlyk işleri barada hasabat berdi. Şol olimpiadalaryň biri Halkara ynsanperwer ylymlary we ösüş uniwersitetinde geçiriler. Hasabatda bellenilişi ýaly, «Türkmenistanda tebigy we takyk ylmy ugurlara degişli dersleri okatmagy kämilleşdirmegiň Konsepsiýasynda» kesgitlenen wezipeleri durmuşa geçirmek, bilim ulgamynda halkara hyzmatdaşlygy has-da ösdürmek maksady bilen, şu ýylyň 23 — 28-nji apreli aralygynda Halkara ynsanperwer ylymlary we ösüş uniwersitetinde talyplaryň arasynda III Açyk halkara matematika olimpiadasyny ilkinji gezek Aşgabat şäherinde geçirmek göz öňünde tutulýar. Halkara olimpiada Türkmenistanyň ýokary okuw mekdepleriniň talyplaryndan başga-da, Russiýa Federasiýasynyň, Amerikanyň Birleşen Ştatlarynyň, Hytaý Halk Respublikasynyň, Italiýa Respublikasynyň, Rumyniýanyň, Türkiýe Respublikasynyň, Hindistan Respublikasynyň, Belarusuň, Özbegistanyň, Gazagystan Respublikasynyň we beýleki onlarça döwletiň ýokary okuw mekdepleriniň talyplarynyň gatnaşmagyna garaşylýar. Döwlet Baştutany şeýle aň-paýhas bäsleşikleriniň geçirilmeginiň diňe bir zehinli ýaşlary ýüze çykarmaga däl, eýsem, dürli halklar bilen dostlukly gatnaşyklary hem-de dünýäniň esasy ýokary okuw mekdepleri we ylmy merkezleri bilen hyzmatdaşlygy pugtalandyrmaga ýardam edýändigini nygtap, wise-premýere meýilleşdirilen çäreleriň ýokary guramaçylyk derejesinde geçirilmegini üpjün etmegi tabşyrdy.

Serdar Berdimuhamedow DIM-niň 2023-nji ýyl üçin iş meýilnamasyny makullady

gyzgyn — Sun, 15 Jan 2023 01:11:53 +0000

Habar berşimiz ýaly, şu gün sanly ulgam arkaly Türkmenistanyň Ministrler Kabinetiniň nobatdaky mejlisi geçirildi. Mejlisiň barşynda wise-premýer, daşary işler ministri R.Meredow Türkmenistanyň Daşary işler ministrliginiň 2023-nji ýyl üçin iş meýilnamasynyň taslamasy barada hasabat berdi. Bellenilişi ýaly, iş meýilnamasynyň taslamasy «Berkarar döwletiň täze eýýamynyň Galkynyşy: Türkmenistany 2022 – 2052-nji ýyllarda durmuş-ykdysady taýdan ösdürmegiň Milli maksatnamasyndan», 2022 – 2028-nji ýyllarda ýurdy durmuş-ykdysady taýdan ösdürmegiň Prezident maksatnamasyndan, «Türkmenistanyň daşary ykdysady işini ösdürmegiň 2020 – 2025-nji ýyllar üçin Maksatnamasyndan», şeýle-de «Bitarap Türkmenistanyň daşary syýasat ugrunyň 2022 — 2028-nji ýyllar üçin Konsepsiýasyndan» gelip çykýan wezipeleriň esasynda işlenip düzüldi. Resminama Türkmenistanyň Bitaraplyk hukuk ýagdaýyny iş ýüzünde amala aşyrmak, daşary ykdysady gatnaşyklary giňeltmek, durnukly ösüşe hemmetaraplaýyn ýardam bermek, halkara gatnaşyklaryň has ynsanperwer bolmagyna goşant goşmak ýaly esasy wezipeleriň ýerine ýetirilmegine gönükdirilendir. Şeýle-de iş meýilnamasynda Türkmenistanyň dünýäniň dürli ýurtlary bilen hyzmatdaşlygynyň ösdürilmegi babatdaky işler hem beýan edilýär. Onda halkara ykdysady hyzmatdaşlyga möhüm orun berilýär. Şeýle hem Türkmenistanyň daşary ýurt döwletleri, halkara guramalar bilen hyzmatdaşlygynyň çäklerinde ikitaraplaýyn we köptaraplaýyn resminamalaryň taslamalaryny işläp taýýarlamak göz öňünde tutulýar. Prezident Serdar Berdimuhamedow hasabaty diňläp, Türkmenistanyň parahatçylyk söýüjilik, oňyn bitaraplyk we «Açyk gapylar» ýörelgelerine esaslanýan daşary syýasaty durmuşa geçirip, gyzyklanma bildirilýän daşary ýurtly hyzmatdaşlaryň ählisi bilen netijeli gatnaşyklary, ikitaraplaýyn hem-de köptaraplaýyn görnüşde, şol sanda abraýly halkara guramalaryň çäklerinde yzygiderli ösdürjekdigini nygtady. Döwlet Baştutany wise-premýer, daşary işler ministri R.Meredowa bu ugurdaky işleri yzygiderli dowam etmegi tabşyryp, ählumumy derejede parahatçylygyň we howpsuzlygyň esaslaryny pugtalandyrmaga ýardam etmäge gönükdirilen oňyn başlangyçlary ilerletmegiň we durmuşa geçirmegiň, şeýle hem şu ýyl üçin meýilleşdirilen halkara ähmiýetli hemme çärelere ýokary derejede taýýarlyk görmegiň wajypdygyna ünsi çekdi. Prezident Serdar Berdimuhamedow hödürlenen iş meýilnamasyny makullap, Türkmenistanyň diplomatik gullugynyň işgärleriniň ýurduň bähbitlerini hemmetaraplaýyn goramak boýunça öňde goýlan wezipeleri üstünlikli berjaý edip, türkmen döwletiniň halkara gatnaşyklar ulgamyndaky abraýyny has-da belende galdyrmak işine mynasyp goşant goşjakdyklaryna ynam bildirdi.

Türkmenbaşy Halkara deňiz portunyň düzümini döwrebaplaşdyrmak işleri çaltlandyrylýar

gyzgyn — Sat, 14 Jan 2023 23:48:20 +0000

Ozal habar berşimiz ýaly, 13-nji ýanwarda Prezident Serdar Berdimuhamedow sanly ulgam arkaly Türkmenistanyň Ministrler Kabinetiniň nobatdaky mejlisini geçirdi. Mejlisde Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýewiň hasabatynyň dowamynda Türkmenbaşy Halkara deňiz portunyň işi, onuň maddy-enjamlaýyn binýadyny mundan beýläk-de döwrebaplaşdyrmak boýunça görülýän çäreler barada-da aýdyldy. Şunuň bilen baglylykda, port hojalygynyň tehniki üpjünçiligi, döwrebap serişdeleri almak boýunça amala aşyrylýan işler barada hasabat berildi. Döwlet Baştutany hasabaty diňläp, port düzüminiň pugtalandyrylmagynyň we döwrebaplaşdyrylmagynyň wajypdygyna ünsi çekdi we bu ugurda işleriň depginlerini ýokarlandyrmagyň möhümdigini bellemek bilen, agentligiň ýolbaşçysyna birnäçe anyk görkezmeleri berdi.

Keçpelek - Nury Halmämmedow

DrWaltBishop — Mon, 16 Sep 2019 07:35:32 +0000

Görüň, bakyň keçpelegiň işini,
Keç bolsansoň keçjallygna baş goýdaý.
Maral hiç bakmady howmy hyşyna,
Kesip kesip ýaralarma duz goýdaý.
Ah, ýar Maral eý.

Göýä artyk idi hürden, melekden,
Şol melege zülüm ýetdi pelekden,
Teniň deşik deşik boldy elekden,
Gan bermäge jan çykmaga ýüz goýdaý.
Ah, ýar Maral eý.

Karar etdik bile barsak ikimiz,
Derýa gyrasynda batdy ýükümiz
Jelluw-per eýledi pelek ýükümiz,
Men ölermen sen bu zarda gal indeý.

Wideo: https://www.youtube.com/watch?v=Q2j6v9E-CeA
Wideo: https://www.youtube.com/watch?v=HcyFcxniixc

Türkmenistanda Halkara Nowruz güni ýokary derejede bellenildi

gyzgyn — Fri, 22 Mar 2019 08:13:19 +0000

Şu gün ýurdumyzda Milli bahar baýramy - Halkara Nowruz güni köpöwüşginli dabaralara beslendi. Baýramçylygyň esasy folklor-etnografiýa çykyşlary Nowruz ýaýlasynyň çäginde ýerleşýän «Türkmeniň ak öýi» binasynyň ýanynda ýaýbaňlandyryldy. Bu ýere baharyň gelmegini, tebigatyň janlanýandygyny, parahatçylygy, adamlaryň arasyndaky ylalaşygy, hoşniýetli goňşuçylyk we dostluk gatnaşyklaryny alamatlandyrýan baýramçylyga gatnaşýan köp sanly myhmanlar ýygnandylar.

...Nowruz ýaýlasynyň esasy girelgesiniň öňündäki meýdançada orta asyr gündogar şäheri äheňindäki derwezeleriň ýanynda hökümet agzalary, Mejlisiň ýolbaşçylary, ministrlikleriň we pudaklaýyn dolandyryş edaralarynyň, jemgyýetçilik guramalarynyň, daşary ýurtlaryň Türkmenistanda işleýän diplomatik wekilhanalarynyň, köpçülikleýin habar beriş serişdeleriniň ýolbaşçylary, ähli welaýatlaryň we türkmen paýtagtynyň, şeýle hem dürli ýurtlaryň wekilleri, şol sanda syýahatçylar - baýramçylyga gatnaşýan köp sanly adamlar duz-çörek bilen garşylanyldy.

Aýdym-sazly çykyşlar ýaýbaňlandyryldy. Soňra ýaýlanyň belent derwezeleri açylyp, guşlaryň owazy, çeşmeleriň joşgunly sesleri eşidilýär. Bahar paslynyň esasy alamaty bolan ýyldyrym çakyp, gök gümmürdeýär. Şeýlelik bilen täzeden janlanan topraga ýaz ýagşy ýagýar.

Bu ýerde, ozalky ýyllarda bolşy ýaly, baýramçylyk şäherçesi döredildi. Hatara guralan ak öýler, giň howlular, baglar, senetkärleriň ussahanalary, gündogar bazarynyň ruhubelent täjirleri, sergi meýdançalary bu künjege özboluşly bezeg berýär. Şeýle hem sahnalaşdyrylan çykyşlar ýaýbaňlandyrylýar. Bagşylaryň, sazandalaryň, tansçylaryň we estrada aýdymçylarynyň joşgunly owazlary utgaşyp, ajaýyp sazlaşygy emele getirýär.

Myhmanlaryň öňünde hormatly Prezidentimiz Gurbanguly Berdimuhamedowyň edebi eserleri, şeýle hem «Nowruznama» kitaby esasynda taýýarlanan özüne çekiji, täsirli sahna eserleri ýaýbaňlandyryldy. Olarda bu nurana baýramçylygy garşylamagyň gadymy däpleri öz beýanyny tapýar. Tomaşaçylaryň öňünde asyrlaryň we müňýyllyklaryň ýagşy dessurlary, bahar paslynyň gelmegi bilen döredilýän bereket bolçulygy, täze günüň şuglasy, şeýle hem şadyýanlyk emele gelýär.

Topragyň janlanýandygyny, tebigatyň oýanýandygyny alamatlandyrýan Nowruz gadymy döwürlerden bäri döredijilik güýjüniň erkinligini, halk döredijiliginiň ähli görnüşleriniň ýüze çykmagyny, köp sanly nesilleriň ruhy we medeni gymmatlyklaryny özünde jemleýär. Nowruz ýaýlasynda Ahal, Balkan, Daşoguz, Lebap we Mary welaýatlarynyň folklor, aýdym-saz we teatr toparlary öz çykyşlarynda halkymyzyň ajaýyp däp-dessurlarynyň häzirki döwürde kämil derejede ösdürilýändigini görkezdiler.

Soňra ýaşajyk artistleriň çykyşlary boldy. Birleşdirilen çagalar tans toparlary «Ýag, ýagyş!» atly folklor çykyşyny ýerine ýetirdi. Şonda körpe artistler Nowruzyň gelendigini baýramçylyk çykyşlary we şadyýan goşgy setirleri bilen buşlaýarlar. Soňra dabara gatnaşýan çagalaryň hemmesi bu çykyşlara goşulýar.

Soňra Ahal welaýatynyň tans-etnografiýa topary sahnalaşdyrylan eserleri ýaýbaňlandyrdylar. Onuň dowamynda derwüşleriň gadymy tansyny ýerine ýetirýänleriň hataryna deprekçiler topary goşulyp, bu çykyşa joşgun berdiler. Bu ýerde dikilen ak öýleriň ýanynda Nowruzyň gelmegi bilen baglanyşykly dürli däp-dessurlar öz beýanyny tapdy.

Myhmanlaryň gezelenç edýän ýolunyň beýle tarapynda ajaýyp baglyk görünýär. Şol ýerde Lebap welaýatynyň sungat ussatlary ekerançylyga we bagçylyga bagyşlanan sahna eserleri bilen çykyş edýärler. Çykyşlarda «Paýhas çeşmesi» atly kitapdaky nakyllar esasynda döredilen görnüşler ýaýbaňlandyryldy. Onda halkymyzyň janly tebigata bolan söýgüsi, mähriban toprak hakyndaky aladasy aýdyň duýulýar. Kitapda «Bir nahal ekseň, ýaşyň baky...» diýlen jümläniň manysy çykyşlarda görkezilýär.

Haly we dokma önümleriniň, süýt önümleriniň, şeýle hem türkmen topragynda giňden ösýän dermanlyk ösümlikleriň we olardan taýýarlanylýan tenekar çaý içgileriniň sergisi edebi-sazly çykyşlar bilen bir bitewi sazlaşygy emele getirdi. Kaşarlary, Garagum sährasynyň öri meýdanlaryny, çopan goşlaryny beýan edýän görnüşler dabara gatnaşyjylarda ýatdan çykmajak täsirler galdyrdy.

Bu ýerde şeýle hem çal, gatyk, süzme, aýran, gurt, saryýag, mesge, owuz, peýnir, sargan, motal ýaly türkmenleriň däp bolan süýt önümlerini taýýarlamagyň syrlaryny bilip bolar ýa-da ýüň daramak, gamyş örmek işlerinde öz ukybyňy synap, keçe basmaga öz goşandyňy goşup, dokma enjamyny işledip, deri önümlerinden possunlary, telpekleri, gaýyş ädikleri tikmegiň usullaryny synlap bolar.

Soňra sahnalaşdyrylan çykyşlarda Nowruzyň ylmy dünýäsi, onuň taryhy barada gürrüň berildi. Mary welaýatynyň teatr artistleri filosofiýanyň, lukmançylygyň, matematikanyň, astronomiýanyň ösüşine ägirt uly goşant goşan Gündogaryň görnükli alymlarynyň keşplerini janlandyrdylar. Olaryň hatarynda Omar Haýýam, Al Biruni, Al Horezmi, As Suli, Al Farabi, Lukman Hekim, Nejmeddin Kubra, Zamahşary, Mäne Baba we beýlekiler bar.

Bu görnüşler hormatly Prezidentimiz Gurbanguly Berdimuhamedowyň «Türkmenistan - Beýik Ýüpek ýolunyň ýüregi» kitabynyň Gadymy Merw hakyndaky bölümleri esasynda taýýarlandy.

Folklor toparlarynyň çykyşlary gadymy obserwatoriýanyň, kitaphananyň we şol döwrüň ýadygärlikleriniň taryhy şekilleri, gum hem-de gün sagatlarynyň nusgalary, şeýle hem Türkmen döwlet medeniýet institutynyň talyplarynyň ýerine ýetirmeginde taryhy gymmatlyklary rejelemek boýunça işler, Döwlet çeperçilik akademiýasynyň talyplarynyň küýzegärlik we beýleki sungat eserleri baradaky sahnalary giňişleýin beýan edildi.

Döwlet Baştutanymyzyň «Türkmen medeniýeti» atly kitabynyň bölümleri türkmen milli aşhanasyna bagyşlanan çykyşlaryň esasyny düzdi. Onda Nowruzyň esasy tagamy hasaplanylýan semenini taýýarlamagyň usullary, baýramçylyk sowgady üçin bugdaý maýsasyny ösdürmegiň usullary görkezildi. Bu görnüşleri Daşoguz welaýatynyň folklor toparynyň agzalary ussatlyk bilen ýerine ýetirdiler.

Aýal-gyzlar degirmende dänäni üwemekden, uny elemekden we ony garmakdan başlap, hamyry taýýarlamagyň gadymy usulyny görkezdiler. Soňra tamdyrlara çörek ýapyldy we olar ähli isleýänlere hödür edildi. Myhmanlara ýörite gapda ösdürilip ýetişdirilen we alaja daňylan bugdaý maýsalary sowgat berildi.

Tomaşaçylar gatlama, çapady, pişme, çelpek, petir çörek, ýagly çörek ýaly milli nygmatlaryň taýýarlanylyşyny gördüler we bu tagamlardan gyzgynlygy bilen dadyp görmäge mümkinçilik aldylar.

Türkmenleriň ähli baýramçylyk dabaralaryna ajaýyp bedewlere atlanan ussat çapyksuwarlar gatnaşýarlar. «Türkmen atlary» döwlet birleşiginiň halkara sirk festiwallarynyň ençeme gezek ýeňijisi bolan «Galkynyş» milli at üstündäki oýunlar topary «Nowruzyň milli oýunlary» atly çykyşy görkezdi. Bu şowhunly sahna hormatly Prezidentimiz Gurbanguly Berdimuhamedowyň «Ahalteke bedewi - biziň buýsanjymyz we şöhratymyz» atly kitabynyň beýany boldy.

Ine, ýene-de türkmen jigitleri ajaýyp bedewlerde sazyň astynda özleriniň belent ussatlyklaryny görkezýärler, hemmelere ýatdan çykmajak tolgundyryjy duýgulary bagyşlaýarlar. Bedewleriň seýkin basyşy hem-de çalasynlygy olaryň kamatyna laýyk gelýär.

Mundan başga-da, Balkan welaýatynyň birleşen folklor topary küştdepdi tansyny ýerine ýetirdi, oňa dabara beýleki gatnaşyjylar hem höwes bilen goşuldylar.

Şol wagt ýaşlar halk oýunlaryny oýnap, ony şadyýan aýdymlar we şahyrana degişme setirler bilen utgaşdyrýarlar. «Serpaý» folklor-etnografiýa topary milli oýunlaryň şekilleri utgaşdyrylan çykyşy görkezdi. Tomaşaçylar şeýle hem türkmen milli göreşi boýunça pälwanlaryň tutluşyklaryny, ýaglyga bökmek bäsleşigini synladylar. Milli oýunlaryň hatarynda şeýle hem aýterek-günterek, çilik, çowgan, altyn gabak, guýruk tutdy we beýlekiler ýerine ýetirildi.

Monjugatdy gyzlaryň arasynda iň köp ýaýran oýunlaryň biridir, monjuklarda pal atylýan bu oýun wagtyň geçmegi bilen başarjaňlygy ýüze çykarmakda degişme häsiýetli bäsleşige öwrüldi. Oýnuň dowamynda gyzlar gazallary ýerine ýetirýärler, läle kakýarlar, toý aýdymlaryny aýdýarlar.

Bu sahnany «Meňli», «Näzli», «Aşgabat» toparlarynyň, talyp gyzlar döredijilik toparlarynyň gatnaşmagynda Daşoguz welaýatynyň birleşen folklor topary ýerine ýetirdi. Ýoluň ugry boýunça aýal-gyzlaryň el işleriniň, nepis keşdeleriň, nagyşlaryň, keteni matasynyň, haly önümleriniň, sowgatlyklaryň we beýlekileriň sergisi guraldy.

Bu görnüşleri «Nowruzyň aşhanasy» atly bölüm jemledi, onda hormatly Prezidentimiz Gurbanguly Berdimuhamedowyň tagallasy bilen çap edilen «Bereketli türkmen saçagy» kitapdan aýry-aýry bölümler sahnalaşdyryldy. Merkezi ýodajygyň iki tarapy boýunça milli aşpezligiň tagamlary bilen miweler, gök önümler bilen bezelen saçaklar ýazyldy, bu tagamlar aşpezlik sungatynyň iň gowy aşpezleri tarapyndan taýýarlanyldy. Olar aşhana gurallary bilen dürli tagamlary taýýarlamagyň tälimlerini görkezdiler. Dabara gatnaşyjylar höwes bilen tagamlardan dadyp gördüler. Bu ýerde kyrk gazan atarylyp, olardan palawyň, ýarmanyň, çorbanyň, unaşyň, dogramanyň tagamly ysy siňen tüsseler göge göterilýär.

Nowruzyň baýramçylyk tagamlarynyň hatarynda gaýnatma, buglama, çekdirme, tamdyrlama, nowruz köjesi, ýumurtgaly, etli, ysmanakly, kädili börek we beýlekiler bar. Biraz aňyrrakda bolsa gazanlama, mäş, jöwen, dürüşde, şüle, gömme, içlekli, gutap, somsa tagamlary hoşboý ysy bilen özüne çekýär. Goýun etinden çişlikler, gowrulan balyk, kebap tagamlary hem baýramçylyk çäresine ýakymly öwüşgin çaýdy.

Şeýle hem bu ýerde ter gök önümler we miweler hödür edildi, olar türkmen topragynyň, baglaryň miweleriniň, balyk önümleriniň we beýlekileriň sergisiniň üstüni ýetirdi. Teatr artistleriniň ýerine ýetiren sahnalary tomaşaçylarda uly täsir galdyrdy.

Aýdymçylaryň we sazandalaryň çykyşlary baýramçylyga özboluşly öwüşgin çaýdy. Şonda halk aýdym-sazlary biziň günlerimiziň estrada owazlary bilen aýratyn sazlaşyk döretdi. Dabara umumy küştdepdi tansy bilen jemlendi.

Nowruza bagyşlanan dabara gadymy baýramçylygyň däpleriniň täze many-mazmun bilen baýlaşdyrylýandygyna, biziň mirasymyzyň bolsa, häzirki nesiller tarapyndan dowam etdirilýändigine ýene-de bir gezek göz ýetirmäge mümkinçilik berdi.

Ahal jülgesinde şadyýan baýramçylyk, agşam çagy dowam etdirildi - şonda öňden gelýän dessurlar berjaý edilip, ot ýakyldy hem-de isleg bildirýänleriň ählisi gadymy döwürlerde ata-babalarymyzyň edişi ýaly, oduň üstünden böküp geçdiler, belent hiňňildiklerde uçdular. Hiňňildiklerde uçmak ruhy taýdan arassalanyş hasap edilýär, bu adat täze ýyla täze gujur, päk ýürek we nurana niýetler bilen girmäge mümkinçilik berýär.

Asyrlar we müňýyllyklar geçýär, ýöne taryhy sepgitlerden geçen bu baýramçylyk biziň günlerimizde hem türkmen halkynyň durmuşynda möhüm ähmiýete eýedir. Ol öçmejek merjen bolmagynda galmak bilen, bize gözellik we hoşniýetlilik duýgularyny peşgeş bermegini dowam edýär, dostluga, doganlyga, agzybirlige, täze üstünliklere çagyrýar.

Şu gün baýramçylyk konsertleri we köpçülikleýin medeni çäreler ýurdumyzyň sebitleriniň merkezleriniň ählisinde we Aşgabat şäherinde, şol sanda açyk meýdançalarda we seýilgählerde, raýatlarymyzyň köpçülikleýin dynç alýan ýerlerinde geçirildi.

Hormatly Prezidentimiz Gurbanguly Berdimuhamedowyň belleýşi ýaly, Nowruz türkmen halkynyň döredijiliginiň, ruhubelentliginiň hem-de tutanýerli zähmetiniň aýdyň beýanyna öwrülip, ösüşiň has belent sepgitlerine çagyrýar we biziň ýüreklerimizde rowaç Watanymyza buýsanç duýgusyny berkidýär.
Goşundy-1 (https://gyzgyn.com/330/turkmenistanda-halkara-nowruz-yokary-derejede-bellenildi?show=331#c331): Prezidentimiz Gurbanguly Berdimuhamedow watandaşlaryň Milli bahar baýramy bilen şeýle gutlady.
"Eziz watandaşlar!
Mähriban halkym!
Sizi Berkarar döwletimiziň bagtyýarlyk döwründe, «Türkmenistan - rowaçlygyň Watany» diýlip yglan edilen ýylda giňden bellenýän Milli bahar baýramy - Halkara Nowruz güni bilen tüýs ýürekden gutlaýaryn! Egsilmez ylham-joşgunyň, ak arzuwlaryň, ýagşy niýetleriň, belent maksatlaryň gözbaşy bolan bu baýramyň halkymyzyň ruhuny has-da belende göterip, tutumly, beýik işlere galkyndyrjakdygyna berk ynanýaryn.
Gadymy Nowruz baýramy müňýyllyklardan gözbaş alyp gaýdýan parahatçylyk, dostluk, ynsanperwerlik we hoşniýetli goňşuçylyk däplerini özünde jemleýär.
Gündogar halklarynyň, şol sanda türkmen halkynyň hem baý durmuş tejribesine daýanýan, köpöwüşginli däp-dessurlary, medeni gymmatlyklary özünde jemleýän bu baýrama ähli döwürlerde uly sarpa goýlupdyr. Asyrlaryň dowamynda onuň many-mazmuny yzygiderli baýlaşdyrylyp gelnipdir.
Şoňa görä-de, Nowruz baýramy ÝUNESKO-nyň Adamzadyň maddy däl medeni mirasynyň sanawyna girizildi hem-de Birleşen Milletler Guramasynyň Baş Assambleýasy tarapyndan döwletleriň arasynda parahatçylykly gatnaşyklary pugtalandyrýan, halklaryň taryhy-medeni däplerini wagyz edýän baýramçylyk hökmünde halkara derejesine eýe boldy.
Halkara Nowruz güni dünýäniň onlarça ýurdunda giňden bellenilip, halklaryň nurana geljege bolan röwşen arzuw-umytlarynyň nyşanyna öwrüldi.
Bu baýram adamzadyň umumy medeni mirasynyň, köpasyrlyk däp-dessurlarynyň bitewüligini beýan edýär. Halklary parahatçylyk we hoşniýetli goňşuçylyk däpleri esasynda ýakynlaşdyrýar.
Jemgyýetimizi ösdürmegiň, döwletara we halkara medeni-ylmy gatnaşyklary giňeltmegiň möhüm şerti hökmünde biz halkymyzyň köp müňýyllyk taryhy tejribesiniň, gadymy däpleriniň, ruhy we maddy gymmatlyklarynyň, medeni mirasynyň bütin dünýäde wagyz edilmegine aýratyn ähmiýet berýäris.
Gözel türkmen topragynyň läle-reýhanly, gül-gülälekli ajaýyp künjegi bolan Nowruz ýaýlasynda Halkara Nowruz gününiň - Milli bahar baýramynyň uly dabaralara beslenip, giňden bellenip geçilmegi asylly däp-dessurlarymyza ygrarlydygymyza aýdyň şaýatlyk edýär.

Eziz watandaşlar!
Nowruz täze güni, täze durmuşy alamatlandyryp gelýär.
Şoňa görä-de, bu baýram berkarar döwletimiziň bahar joşguny siňen täze ösüşleri, täze özgertmeleri, ýeten belent sepgitleri bilen hem berk baglanyşýar. Bu günler tebigatyň täzelenip, gözel keşbe beslenişi ýaly, berkarar Watanymyz hem gülläp ösüşlere eýe bolýar.
Baýramçylyk günlerinde başy başlanýan döwletli işler, ýurdumyzyň dürli künjeklerinde açylyp, ulanmaga berilýän binalar bu hakykaty tassyklaýar.
Bahar pasly gözel tebigata, ynsan kalbyna uly ruhubelentlik, jümle-jahana täzeleniş bagyş edýär.
Keremli türkmen topragyna Günüň mähir-çogunyň siňmegi bilen, daýhançylyk we maldarçylyk bilen meşgullanýan watandaşlarymyz üçin örän jogapkärli we gyzgalaňly döwür başlanýar.
Bereketli saçaklarymyzyň datly naz-nygmatlardan dolup durmagy, mukaddes topragymyzdan önýän hasylyň berekediniň egsilmezligi dileg edilip, täze hasylyň düýbi tutulýar.
Bu baýram halkyň rysgal-döwletliliginiň hem nyşanydyr.
Şoňa görä-de, Nowruz baý medeni we edebi mirasymyzda, halk döredijiliginde öz mynasyp waspyna eýedir.
Tebigatyň, jümle-jahanyň joş urýan bahar çagynda ýaşaýşy, tämizligi we gözelligi bagyş edýän Milli bahar baýramynyň döredijilik kuwwaty, joşgunly dabarasy toý-baýramlarymyzyň gadyr-gymmatyny artdyrýar, ata Watanymyzyň, mukaddes topragymyzyň, bagtyýar halkymyzyň şan-şöhratyny we mertebesini has-da belende göterýär.

Eziz watandaşlar!
Mähriban halkym!
Sizi ynsan durmuşyny nurlandyrýan, ruhuny galkyndyrýan, asylly duýgulary joşa getirýän Milli bahar baýramy - Halkara Nowruz güni bilen ýene-de bir gezek tüýs ýürekden gutlaýaryn!
Berkarar döwletimiziň bagtyýarlyk döwründe beýik maksatlara tarap ynamly öňe barýan merdana halkymyza berk jan saglyk, egsilmez bagt, abadan durmuş we uly üstünlikleri arzuw edýärin."

Horwatiýaly Rober Grdowiç Futzal ýygyndymyzyň baş tälimçisi

gyzgyn — Thu, 21 Mar 2019 07:06:05 +0000

45 ýaşly horwatiýaly hünärmen Rober Grdowiç Türkmenistanyň futzal boýunça milli ýygyndysynyň baş tälimçisi wezipesine bellenildi diýip, Türkmenistanyň Futbol federasiýasyndan Turkmenportala habar berdiler. Tälimçi bilen gepleşikler TFF-niň baş direktory Arslan Aýnazarowyň Horwatiýanyň Futbol federasiýasynyň ýerine ýetiriji direktory Damir Wrbanowiç bilen Zagrebdäki duşşuyklarynyň çäginde geçirildi.

Rober Grdowiç 1974-nji ýylyň 23-nji fewralynda Germaniýanyň Zindelfingen şäherinde dünýä indi. Ol dürli ýyllarda “Uspinýaça” (Horwatiýa), “Kalýari” (Italiýa), “Žensano” (Italiýa), “Petar” (Horwatiýa), “Gostiç” (Horwatiýa), “Brodospilt Inženering” (Horwatiýa), “Zapad” (Horwatiýa) ýaly futzal toparlarynda oýnap, 2011-nji ýylda karýerasyny tamamlady.

Ol Horwatiýanyň milli ýygyndysynda hem baý tejribe toplady. Milli ýygyndy bilen 56 duşuşykda 38 gezek tapawutlanan hünärmen 2000-nji ýylda kiçi futbol boýunça dünýä çempiony, 1999 we 2001-nji ýyllarda bolsa Ýewropanyň çempiony boldy.

Tälimçilige başlansoň bolsa “Zapad”, “Nasional” ýaly toparlary türgenleşdirdi.

Ozal hem habar berşimiz ýaly, 2020-nji ýyldaky Aziýa çempionaty Aşgabatda geçiriler. Horwatiýaly hünärmeniň öňünde goýlan esasy wezipe Türkmenistanyň futzal ýygyndysynyň paýtagtymyzda geçiriljek yklym ýaryşynda üstünlikli çykyş etmegini ýola goýmakdyr.

ÇEŞME: Türkmen Portal
Goşundy-1 (https://gyzgyn.com/329/horwatiyaly-rober-grdowic-futzal-yygyndymyzyn-talimcisi?show=332#c332): Horwatiýaly hünärmen Robert Grdowiç-iň Zadarski söhbetdeşligi

Horwatiýaly hünärmen Robert Grdowiç Türkmenistanyň futzal boýunça milli ýygyndysynyň baş tälimçisi wezipesine bellenensoň, Horwatiýanyň "Zadarski.hr" neşiri täze işi bilen bagly tälimçi bilen söhbetdeş boldy.

"Hawa, bu dogry. Men häzir Aşgabada ugraýaryn. Türkmenistanyň Futbol federasiýasy bilen 1+1 ýyllyk şertnama baglaşdyk. Bu iş meniň tejribäm üçin hem uly synag bolar. 2020-nji ýylyň fewralynda Türkmenistanda futzal boýunça Aziýa çempionaty geçiriler. Yklym ýaryşynda üstünlikli çykyş edip bilen toparlar ýene-de şol Litwada geçiriljek dünýä çempionatyna-da gatnaşmaga hukuk gazanar. Men Türkmenistanyň ýygyndysy bilen gowy netijeleri gazanyp bileris diýip umyt edýärin. Men Youtube ýaýlymlary arkaly Türkmenistandaky futzalyň derejesi bilen tanyşdym. Ony has ýokary çekip bolar" diýip, horwat metbugatynda R.Grdowiçiň aýdanlary getirilýär.

Horwat futzalynyň ady rowaýata öwrülen wekili öz ýany bilen kömekçilerini, şol sanda derwezeçileri taýýarlaýan tälimçileri hem Aşgabada alyp geler.

Döwletjan Ýagşymyradow

gyzgyn — Sun, 17 Feb 2019 04:49:14 +0000

Doglan senesi: 22.05.1989 ý
Agramy: 92kg
Boýy: 180
Kategoriyasy: Light Heavyweight
Çykyş edýän topary: Kars
Çykyş edýän guramasy: ACB, Russiýa (reýtingde 6-njy orny eýeleýär)

Oyun: 23
Ýeňiş: 17
Utulgy: 5
Deňeçer: 1

Ýeňiş - 16.02.2019 - Karol Celinski
Ýeňiş - 05.05.2018 - Batraz Agnaev
Ýeňiş - 27.01.2018 - Luis Fernando Miranda
Ýeňiş - 25.11.2017 - Joachim Christensen
Ýeňiş - 17.07.2017 - Jared Trogeson
Ýeňiş - 21.01.2017 - Dan Konecke
Ýeňiş - 14.05.2016 - Witaliy Onishchenko
Utulgy - 20.09.2015 - Mikhail Ragozin
Ýeňiş - 28.08.2015 - Maxim Kushnerenko
Utulgy - 18.10.2014 - Magomed Ankalaev
Ýeňiş - 28.12.2013 - Fuad Gadirov
Ýeňiş - 02.11.2013 - Borys Polezhai
Ýeňiş - 20.06.2013 - Arsen Mensitov
Ýeňiş - 11.05.2013 - Bodan Savchenko
Ýeňiş - 27.04.2013 - Anton Stepanenko
Utulgy - 23.03.2013 - Aleksander Boyko
Ýeňiş - 09.03.2013 - Mihail Petkov
Utulgy - 16.02.2013 - Rashid Yusupov
Ýeňiş - 05.01.2013 - Alekander Barbaryan
Ýeňiş - 21.12.2012 - Sergei Lewandowskiy
Ýeňiş - 24.11.2012 - Arthur Vartanian
Utulgy - 13.05.2012 - Vasily Babich
Deňeçer - 25.03.2012 - Rudolf Kriz

Başa-baş söweş sungaty bilen gyzyklanýanlara Döwletjan Ýagşymyradowyň kimdigini aýtmagyň zerurlygy ýok. Bilýän bolsaňyz, dünýäde başa-baş söweş bilen bagly duşuşyklary guraýan iri guramalaryň ikisi — UFC we Bellator hereket edýär. Bu ugurda çykyş edýän ACB (Russiýa) guramasy ýokarda adyny agzan guramalarymyzdan soň üçünji ýerde durýar.
Başa-baş göreş boýunça 26 ýaşly türkmen pälwany Döwletjan Ýagşymyradow (17-5-1) täze halkara ýaryş bolan Absolute Championship Akhmatyň (ACA) ýarymagyr agram boýunça çempiony boldy.